Un otro weekend carnavalesco ta den porta, caminda SMAC ta presenta su actividadnan pa grandi y chikito.
Eleccion Prins y Pancho
Diasabra 14 di Januari publico ta keda invita pa e eleccion di Prins y Pancho pa e temporada di Carnaval 63. E anochi lo cuminsa pa 7’or y e eleccion ta priminti di bira uno hopi pret y festivo. Entrada ta 5 florin, obtenibel na porta, cerca participantenan y na oficina di SMAC. Bin apoya e talentonan chikito, hoben y grandi na Aruba Entertainment Center. Na final lo cera riba ritmonan di banda Tsunami. Bar y cushina lo ta bon surti.
Parada di Blaas
Diadomingo nos ta celebra cu nos muchanan na San Nicolas den e Parada di Blaas. Por spera un gran cantidad di mucha den parada, gosando y bailando cu fantasia di blaas. E secuencia di gruponan ta 1.Deja Kids y Centro di Bario Noord cu STEAM, Grupo Nos Futuro cu NBO, TOB Kids cu ‘N Fuzion, Pink Kids cu Le Groove, Little Groovers y Champagne Kids cu BMW.
E ruta ta diferente e aña aki. Ta pidi publico pa tene bon cuenta cu esaki. Salida ta di Macro Supermarket – Pastoor Hendrikstraat – Caya Dick Cooper – B.v.d. Veen Zeppenfeldtstraat – Caya Captain H. Rodgers – Lagoweg – Crusa Bernardstraat – Lagoweg – Pastoor Hendrikstraat – Final ta Joe Laveist Sport Park.
Parada ta sali 2’or di atardi y ta termina 6’or di atardi. Camindanan lo wordo cera 1’or. Tene na cuenta cu ta prohibi pa staciona auto ariba acera nan di klinker. Nos ta spera tur hende diadomingo awo pa presencia e prome parada di mucha, e Parada di Blaas. Corda riba e proteccion di solo pa esunnan chikito, percura pa nan ta bon hidrata y cuida nan oido cu earplugs. Bay trankil riba caretera y corda riba bo #AMIGODIDI si ta consumi alcohol. Un feliz weekend di carnaval!