SMAC kier a gradici e publico carnavalesco y tur participantenan cu a sa di apoya y engrandece e varios actividadnan di Carnaval 63, weekend cu a pasa.
Jouvert Morning
Diasabra marduga tabata programa pa sali 4’or e Jouvert Morning. Na inicio, SMAC, den presencia di Famia y Amistadnan, a duna homenahe na Sr. Nando Browne.
E Jouvert Morning di e aña aki a ser dedica na feliz Memoria di conocido cantante, artista, entertainer, compositor Nando “Breakah” “Energyman” Browne, kende a bay sosega. Un gran cantidad di persona a tuma e oportunidad pa recorda Nando Browne por medio di bisti algo di color biña. Por a mira t-shirts di Nando, Massive Brassband a bisti nan binja, hopi hende a verf curpa cu verf biña, of a bisti cualkier acesorio biña. Jouvert Morning a wordo atendi masalmente y por bisa cu e aña aki a surpasa e cantidad di 10.000 persona. Un danki grandi na tur banda cu a respalda Jouvert Morning cu nan presentacion. Massive Brassband, STEAM, ‘N Fuzion, Flashback Disco, Le Groove, Mike’s Super Disco, NBO y Tsunami. A reina un ambiente sin igual, y ta ser menciona como un di e miho actividadnan pa publico te awor.
Lighting Parade
Diasabra anochi a toca turno na Aruba su Lighting Parade. No obstante algun obstaculo prome cu parada, a logra sali na e hora stipula di 8’or. Un grupo mester a warda pa trailer di nan grupo wordo drecha y asina a logra sali como ultimo grupo den e secuencia y logra bay hunto cu e salida di e parada. E gruponan den Lighting Parade a bin cu bunita creacion nan di diferente tema den cada grupo di carnaval. Tabata tin masa yen di luz y diseñonan hopi bunita di headpieces. E Lighting Parade a drenta na un ora nechi y por a compronde cu comportacion di e publico nan banda tabata bon tambe.
Parada di Mucha San Nicolas
Riba diadomingo 19 di Februari tabata e ultimo parada pa e muchanan. Despues tambe a programa e Kimamento di Momito den Carnival Village. A subi caminda poco despues di 2’or cu mas di 1100 participante. Un dia bunita yen di solo y e ambiente unico di San Nicolas cu a sa di saca e miho di tur grupo y tur e muchanan riba caminda. Un parada yen di fantasia y creatividad unda por mira claramente e cantidad di tempo y trabou cu ta hinca den esaki. SMAC ta manda palabranan di pabien na tur group leader y e muchanan en especial cu a briya, nan mester dunanan mes un high-five pa e bon presentacion y pa nan aporte na nos Carnaval. Despues di e parada uni un masa grandi den Carnival Village pa e evento di Kima Momito. Publico por a disfruta di e banda White Boys Groove hunto cu tur e participantenan infantil y hubenil di festival di Calypso y Roadmarch 2017 y tambe di Tumberito. Asina a clausura e temporada di Carnaval 63 pa nos Muchanan. Un bon noticia cu a drenta via KPA ta cu durante e parada aki no tabata tin niun detencion. Pues un danki y pabien grandi na e publico carnavalesco.
Esaki lo ta e ultimo siman di Aruba su Carnaval 63. Riba e schedule ainda tin Parada di Luz riba diabierna y Aruba su Grand Carnaval Parade na San Nicolas y Oranjestad riba diasabra y diadomingo venidero. Keda pendiente pa tur informacion relevante riba esaki.