Segun Sra. Arends-Reyes ta keda importante pa continua y amplia proyectonan pa ‘opvang’ despues di orario di scol. Specialmente pa nos hobennan di scolnan secundario tambe lo beneficia hopi di programanan extra curricular. Sra Arends-Reyes ta un persona cu semper a boga pa keda cu proyectonan manera Traimerdia y ta sostene su continuacion y ampliacion. Pero tambe ta pone hopi enfasis ariba nos hobenan y kico lo por brinda nan.
Durante Gabinete ME II a cuminsa cu un proyecto piloto pa brinda asina despues di orario di scol un tipo di opvang pa nos hobennan na diferente skol. Den pasado tambe diferente scol a habri nan porta pa ofrece huiswerkbegeleiding y ayudo cu diferente vak. Caminda semper ta keda un punto di discusion ta e personal pa realisa e proyectonan aki. Maestronan despues di ora di scol mester di un ‘break’ tambe pues den e caso ey ta dificil di haya maestronan cu kier keda mas tempo na scol. Netamente pa e motibo aki na otro paisnan ta ofrece otro tipo di actividad y ta enfoca mas ariba e parti social, formacion y movecion cu otro personal cu no ta e maestronan.
Ta cientificamente comproba cu hobennan cu no tin nada di hasi despues di scol y ta keda nan so na cas e asina llama ‘sleutelkinderen’ ta busca pa experimenta y por bay den mal caminda. Nos tin en total 22.000 mucha y hoben cu tin edad escolar y lo mester wak con por brinda hopi mas mucha y hoben actividadnan extra curricular despues di skol. Recientemente a hasi un evaluacion y a identifica kiko ta e puntonan cu mester traha riba nan y kiko ta e situacion actual di Aruba. E continuacion di proyectonan despues di orario di skol mester keda un prioridad pa Pais Aruba y sigur lo mester sigui pa cosecha exito na beneficio di Aruba su hubentud.