Tur aña SKOA tin inscripcion pa kleuter y eerste klas. E aña aki inscripcion lo tuma luga di dia 6 te cu 9 februari, y di 13 pa 17 di Februari. Mayornan cu tin yiunan na kleuterschool cu ta resorta bou di SKOA, lo haya nan carta entrante 16 di januari. Esey kiermen nan ta haya tur e formularionan cu mester wordo yena y haci e peticion pa nan yiu haya un cupo na un scol di SKOA.
Sra. Josette Daal, directora di SKOA a informa cu den e siman di 18 di Januari lo reparti e mesun tipo di formulario nan aki, na tur crèche cu ta cay bou di fundacion di Crèche, pa asina e mayornan por haci un peticion si nan kier pa nan yiu haya un cupo den un kleuterschool cu ta cay bou di SKOA.
Ta haci peticion na mayornan pa bin inscribi nan yiunan riba e dianan di 6 pa 9 di februari y 13 pa 17 di februari. Sra. Daal ta sigui splica cu despues di e dianan di inscripcion, SKOA lo keda habri pa tuma inscripcion te cu fin di Februari. Pero despues di esaki inscripcion lo cera pa motibo cu lo mester verwerk e informacion pa asina na April mayornan haya carta di e plaatsing di nan yiunan na e scol.
Ta importante pa e mayornan entrega e copia di e azv carnet di e yiu, un copia di 5 florin di Censo pa sa e adres corecto di e mucha pa asina e mucha por wordo ubica den un scol den su mesun bario, cerca di su cas.
Ta urgi mayornan pa tuma nota di e informacionnan suministra, y ta haci apelacion na tur media pa publica e fechanan di inscripcion mas cu un biaha.
Un di e precoupacionnan di SKOA, ta e hecho cu mayornan kier inscribi nan yiunan cerca di nan trabao. Esey mayornan mester tene cuenta cun’e, pero SKOA a informa caba cu e regio di Playa cu Noord ta yen. SKOA ta purba complace e mayornan, pero no por complace tur mayor.
Ariba e pregunta dicon scolnan no ta cuminsa na bay mas laat, y ta conoci cu tabata tin plannan pa cu esaki, Sra. Josette Daal a splica cu esey ta keda na e Regiogever y ta cosnan cu mester wordo papia ainda.
Si tin e sistema di Traimerdia unda e mucha ta keda despues di horario di duna les. E tin e opcion di keda den cierto scolnan cu tin Traimerdia, unda e tipo di actividadnan aki ta tuma luga.
No tin plan na e scolnan mes existente, unda un docente ta keda pa haci actividad cu e muchanan, pero esaki ta keda na e Regiogever pa asina haya subsidio pa cu esaki. Asina Sra. Daal a termina bisando.