SKOA semper ta mustra su cifranan

0

Sra. Josette Daal, directora di SKOA ta splica cu un parti cu a bin dilanti ultimo temponan aki, ta cu SKOA no ta transparente cu su cifranan.

Ley ta bisa cu tur departamento subsidia, mester duna bista ariba cifranan. Ley no ta bisa cu mester traha un jaarverslag. SKOA desde añanan 80, a dicidi di inverti placa den un cuenta anual cu e pensamento pa ta transparente. E cuenta anual no ta wordo subsidia y ta wordo paga door di SKOA mes, pa duna e responsabilidad ey.

Den tur e jaarverslagnan aki, SKOA ta responsabilisa e placa di subsidio cu e ta haya. E ta un tiki dificil, pasobra door cu e un cuenta anual ta costa basta placa, dus aworaki mes, na Juni, SKOA lo bay entrega nan cuenta anual 2015. Dus, SKOA ta duna responsabilidad na e placanan cu e ta ricibi di subsidio.

Sra. Daal a sigui bisa cu e sistema di planning, di mantencion, SKOA tin un sistema, cual ta cu e cabesante ta haci su peticion pa “mantencion chikito” pa DOW cu ta e Task Force. DOW ta bin wak e trabao, y DOW ta mand’e e ora ey. A base di e placa di mantencion ta manda haci esaki.

Den pasado, SKOA tabata tin un gebouwbeheerder. Dus un persona special cu ta den veld y e ta wak e edificionan y SKOA ta comunica directamente cun’e. E persona ey no tabata wordo subsidia y SKOA mes tabata pag’e di su mesun fondo. Pero dado momento no por a sigui pag’e y e mester a vloei af.

Aworaki, segun Sra. Daal, e gebouwbeheerder ta e mesun cabesante. E cabesante mester duna guia na e maestronan di e scol, y e cabesante mester atende cu e mayornan tambe.

Pius X school no a bay segun procedura. Y esey a wordo atendi caba cu e scol, pero e no a bay segun procedura y esey ta un lastima cu e situacion a bira asina aki. Ideal lo tabata ta si SKOA tabata tin e gebouwbeheerder. Loke si SKOA tin planea ta pa nan mes drenta veld aworaki.

Segun Sra. Daal, su mesun persona lo subi veld, y repasa tur e situacion di e scolnan. Nan sa caba di e problemanan di cierto scolnan. SKOA ta mira cu regularmente nan ta acudi, segun e procedura via di DOW pa atende cu porta of bentana.

Dos scol a haya renobacion hopi grandi cual ta Rosa College, cu despues di hopi aña a haya un renobacion. Y Colegio San Antonio cu tabata un scol den Santa Cruz, cu tabata un scol den necesidad pa hopi aña. Fuera di esey, cosnan cu a wordo haci den diferente scolnan di SKOA ta p.e., gobierno a drecha e cura di scolnan, algun scol a haya un capa nobo di asfalt. E tipo di cosnan aki a sosode den e ultimo temponan aki.

Pa locual ta trata e parti cu SKOA no ta duna cuenta, Sra. Daal ta haya esaki lamentabel, ya cu SKOA ta paga un accountant pa duna cuenta di e placa di subsidio y eyden tur cos ta para.

Otro punto ta tambe ta cu scol ta basa ariba normbedragen y esaki, pa ley e mester wordo revisa cada dos aña. Ultimo biaha cu esaki a wordo revisa ta di 2010. Dus e placa cu SKOA ta haya ta basa ariba un calculacion di aña 2010.

Y con ta calcula e budget di scol, esey ta pa cabes, bo ta haya tanto pa cabes y tanto pa e localnan cu ta uza den bo scol. Esey ta forma e budget di bo scol. Sra. Daal a duna ehempel di un kleuterschool, di 6 klas, pa aña calendario, y no aña escolar, ta 44.880 florin. Su jaarbestelling, cu ta bay bin aworakinan, di un kleuterschool, ta mas o menos di 14 mil euro. Bo desconta e utilidadnan e ora, mucho no ta resta pa mantencion chikito.

Si e ta un scol, manera den e caso di scol di Dakota, cu ta wordo ataca pa vandalismo, e placa ta caba mesora. Y esey bo no tin na bista. Ta dos bario tin cu ta sufri di vandalismo, ta Dakota y San Nicolas.

Den Dakota e scol cu nan ta target ta Pius X. Na San Nicolas tambe ta un scol so nan ta ataca. Si mester duna ehempel, di un scol basico. Mayoria scol basico tin un budget di un scol basico ta 86.400 florin. Esaki ta un scol basico cu no tin un gymzaal. Si e tin un gymzaal e ta haya algo mas di 7 mil florin, pa mantencion di nan gymzaal. Ta bin acerca, cu e utilidad cu mester wordo paga. Si tin airco, e gastonan ta mas halto. Pa un scol di 12 klas, su budget di leermiddelen tambe ta mas halto.

Por ultimo, Sra. Josette Daal, directora di SKOA a bisa, cu tipo di cosnan asina ta keda un reto.