Den un articulo cu mi a lesa riba pagina 35 den Diario di 20 di maart, mi a lesa con Sr. Lioe-A-Tjam, un politico den desaroyo, a bin na defensa di mangrovenan di Aruba. Como un naturalista ferviente, ami ta aprecia su amor pa fauna di nos isla y su disponibilidad pa proteha nan. Sr. Elton Lioe-A-Tjam ta mustra un animo cu tur Arubiano mester sigui, pero mi tin un problema cu e manera cu el a presenta su defensa.
Refiriendo na un articulo cu supuestamente Sr. Lioe-A-Tjam a lesa den Noticia Cla di 14 di maart 2017, e ta titula su defensa cu un acusacion cu e desaroyado di Proyecto “Zoetry Isla di Oro” tin un campaña di “manipulacion y intimidacion”. Mi tambe a lesa e articulo ey, na Hulandes, pero mi no a nota ningun indicacion di manipulacion ni intimidacion di parti di Sr. Sydow e persona cu NoticiaCla ta cita.
Loke ami a lesa den NoticiaCla ta cu Sr. Sydow a duna un advertencia a base di e rapport “Environmental Impact Assessment for Isla di Oro Zoëtry Resort” prepara pa e empresa Americano Langan International, posiblemente un di e mihonan den su genero. Segun e rapport impactante di casi 300 pagina, e resultadonan di e estudio cu e empresa a haci, e mangrovenan ta muriendo y e coral ta core peliger y algo mester wordo haci. Urgentemente!
Sr. Lioe-A-Tjam ta cataloga e opinionnan di e cientificonan di Langan International como “hilaridad y arogancia”. El a lesa e rapport? Pa ami ta miho informa riba e topico asina importante pa nos isla, mi a lesa mayoria di e rapport y mi a keda asombra con detayadamente Langan International a investiga e situacion aki prome cu nan a duna nan rapport. Mi a busca tambe algo di e empresa Langan International cu a haci e investigacion. Esaki no ta un compania di awa dushi. E tin credencialnan mundialmente reconoci.
Naturalmente Sr. Sydow ta menciona cu su grupo ya a gasta mas di mey miyon dollar cu e estudionan. After all, esakinan tabata e rekisito di gobierno pa haya e permisonan cu nan ta pidiendo. Pasobra e prome rapport a crea algun duda, e grupo a contrata Langan International pa haci di dos estudio cu por cierto a confirma e resultadonan di e prome rapport. En otro palabra, “nos a haci loke a exigi di nos, awor ta na turno di autoridadnan pa haci loke nan mester haci”.
E declaracion di Sr. Sydow cu su grupo tin placa y plannan ta na su luga. Ta un lastima cu Sr. Lioe-A-Tjam a yama esaki “arogancia”. Manera e mester sa, aki ta hopi a bin cu tabata kier tereno of otro concesionnan di autoridadnan cu intencion di specula, no pa construi.
Sr. Sydow ta ofrece e disponibilidad di su organisacion pa coopera cu gobierno y NGO’s pa traha pa salba e area afecta. Esaki no ta “intimidacion” ni “manipulacion”. E forma di cooperacion por wordo defini hunto cu e controlnan necesario pa haci sigur cu tur participante ta haci loke ta rekiri di nan y nada mas. Naturalmente e protocolnan mester inclui e consecuencianan pa cualkier desviacion di e reglanan. Sr. Elton Lioe-A-Tjam ta sospecha cu esaki ta un tactica pa “silencia algun bos ambiental” manera otronan supuestamente a haci den pasado. Mi no ta kere ta husto pa huzga Pablo awor pa loke Pedro a haci den pasado.
Sr. Ljoe-A-Tjam ta descarta e ponencia di Sr. Sydow cu proyectonan similar a wordo completa exitosamente na diferente pais y e ta menciona cu e tambe por bin cu ehempelnan unda e proyectonan similar no a resulta beneficioso pa pueblo of naturalesa. Sr. Sydow to nombra algun pais manera Jamaica, Mexico, Costa Rica y otronan. Sr. Lioe-A-Tjam su argumento lo tabata mas creibel si e tambe a menciona e proyectonan cu a faya, y tambe splica pakico nan no tabata exitoso.
Mi kier sigura Sr. Lioe-A-Tjam y tur cu lesa e articulo aki cu ami no tin ningun interes monetario den e proyecto Zoetry Isla di Oro. Mi ta haya e proyecto aki fantastico y cu lo yuda nos turismo enormemente. E rapport di Langan International a satisface mi cu nos naturalesa no lo keda daña; al contrario, cu e oferta di e grupo tras di e proyecto pa traha hunto cu autoridad y NGO’s e lo beneficia nos flora y fauna. Mi ta spera cu mi por mira e yegada di e prome turistanan cu lo hospeda na Zoetry Isla di Oro na 2019.