Horcan Matthew a trece hopi experiencia pa Meteo. A puntra sr. Barkmeyer di Servicio Meteorologico kico nos a siña di horcan Matthew cu a duna nos depresion den lama y con lo bay drecha e parti di comunicacion.
El a splica cu esaki tabata un sistema cu ta wak’e bin for di leu. Si ta papia di por ehempel zona di conbvergencia intertropical, ta otro cos. Manera loke a pasa dia 20 di November. Por tin condicionnan cu por bisa cu por spera un di e dianan aki zona di convergencia intertropical activa, ta haya cu mal tempo, awasero, etc. Pasobra ta celnan tras di otro ta keda forma. Pero no tin un meteorologo na mundo cu por bisa cu mañan e ta activa. Ta un sistema tropical masha fastioso mes. Un ciclon tropical ta otro. Bo ta mir’e ta cana bin riba su path. Den e ultimo añanan, e pronosticonan riba e direccion cu e ta coy, a mehora obstensiblemente, den e ultimo 20 pa 25 añanan. E margennan di eror a bira mas chikito di loke tabata antes. Alomenos esey por mir’e ta bay den direccion di ki pais cu ta, miho prepara. Tres cos tin cu wak durante un ciclon tropical, awasero, yobida intenso y lama bruto. Aruba, como isla, ta wordo aisla for di tempran door di un sistema asina. Tin cu cera e airstrip, tin cu cera e waf. Ta keda completamente out dado momento pa un paar di tempo sigur, segun sr. Barkmeyer.
Nos por corda nos hotelnan a haya hopi daño. Den e sector hotelero e mensahe no ta yegando. Riba esaki, sr. Barkmeyer a splica cu e sa sigur cu Meteo ta bezig cu e hotelnan. Tin cierto personanan cu nan ta yama y nan ta keda informa. Tin biaha ta haya en berdad cu e reto di comunicacion, un manera of otro ta blokia. Tin cu bisa acerca cu tin biaha ta haya cu atake di virus riba internet, net e momentonan ey. Ta cosnan vervelend cu tin cu trata cun’e, segun Barkmeyer. Dado momento cosnan por bay robes berdad, pero mester purba. Barkmeyer sa duna charla tambe na hotel, prome cu e temporada cuminsa y sigur lo keda purba di mantene contactonan mas firme of kisas por amplia e canalnan tambe di comunicacion cu nan, pa asina e situacion mehora, segun el a bisa por ultimo.