Pa di dos aña consecutivo, un grupo di residente Venezolano, bou di e nomber di fundacion PANA (“Pa Amor di Nos Aruba”) ta demostra con hopi nan ta stima e comunidad cu nan ta biba aden. Durante e prome siman di December, e boluntarionan di PANA a colecta y procesa donacion di paña, cos di hunga y cuminda. Diasabra ultimo, pick upnan yen cu regalo a sali riba un parada pa distribui nan hunto cu Sinterklaas y Zwarte Piet den algun di e barionan di Aruba, for di Noord te San Nicolas.
Den cooperacion cu Minister di Asuntonan Social, a reuni grupo di muchanan na Centro di Bario Noord, Club Universal na Pos Chikito y tambe na YMCA San Nicolas. E grupo no solamente a hiba regalo, pero tambe hopi alegria y musica pa comparti e spirito di Pasco cu esnan cu tin mas mester di dje.
Lidernan di PANA, Alberto Perret Gentil, Franz Sydow y Domingo Aldazoro kier gradici e coordinadonan di e evento Veronica van der Dys, Pilar Sydow y tur hende cu a contribui y a haci di ‘Sinterklaas Riba Caya’, un exito grandi. Pa mas informacion riba PANA of relacion cu Sinterklaas Riba Caya, por fabor tuma contacto cu Alberto Perret Gentil na 593-4730.