Willemstad, CORSOU- Presidente di Sindicato UGTKK cu ta representa e trahadonan di Insel Air, Sr. Wendel Meulen a splica tocante e situacion lamentabel pa cu e trahadonan di di e compania di aviacion aki.
E situacion ta hopi lamentabel, unda cu Insel Air a entrega e cartanan na e trahadonan, cu posiblemente nan lo pidi permiso pa nan retiro. A yama tur e trahadonan di departamento di mantencion, unda cu a splica cu esunnan cu tende nan nomber, lo mester keda den sala. Por a mira mesora cu lagrima a cuminsa sali for di wowonan di e trahadonan y tin hende cu a hasta cay flauw. E tabata un situacion hopi fastioso, di tension.
Sindicato ta lamenta e sistema aplica door di Insel Air. E no ta un sistema profesional. Na momento cu e trahado bin traha cerca bo, ta papia personalmente. Pero awo cu ta bay pidi retiro di e trahado, ta traha na e manera nada profesional aki. E departamento di Recurso Humano a keda un banda. E situacion un biaha mas, Sr. Meulen ta reitera cu e ta keda un situacion fastioso.
Sindicato a invita e trahadonan pa un reunion pa dialuna otro siman pa nan bin haya splicacion di nan dercho y ta speranan na Kraaienhofstraat, pa loke ta nan derecho. Sindicato lo keda vigila e situacion y nan lo conseha e trahadonan cu lo kier protesta contra di nan retiro. En total ta un 250 trahado lo mester bay cas, di cual 80 ta di e departamento di mantencion.
Sindicato lo keda duna nan sosten y nan aporte na e trahadonan di Insel Air te caminda cu esaki ta posibel, segun Sr. Wendel Meulen di sindicato UGTKK.