Despues cu sindicato STA a gana e referendum, ASTEC a manda pidi un reunion cu sindicato nobo segun Sr. Diego de Cuba. E ta amplia mas ariba esaki.
Sindicato STA a manda dos carta pa e compania ASTEC. Un carta tabata tocante e miembrecia, y sindicato a ricibi un contesta for di ASTEC, cual a carta tabata un carta di invitacion na e comision, pa sinta hunto cu nan y tambe cu sindicato. Pa es motibo aki tambe sindicato STA a haya un invitacion pa sinta na mesa cu ASTEC, dia 29 di Juni proximo, pa 4 or di atardi. E reunion lo tuma luga na oficina di ASTEC na Barcadera.
Den e carta di STA, nan tin un compilacion di e puntonan cu nan kier wordo atende ariba nan. Ta trata di puntonan manera, cera conoci cu e compania, miembrecia y referendum cu tin cu wordo reconoci. Tambe puntonan manera cuminsa negocia e contrato colectivo nobo mas pronto posibel. STA ta preparando e concepto caba pa manda pa nan. Y Sr. de Cuba ta kere cu un di e puntonan cu e trahadonan ta mas preocupa ariba dje, ta esun di pension, pa cual nan kier mira un claridad ariba locual cu ta pasando cu e fondo y e placa di pension pa cu e trahadonan.
A puntra Sr. de Cuba con ta posibel cu un trahado no tin derecho di sa di su pension siendo cu ta su placa ta den wega. Segun Sr. de Cuba, tin diferente aspecto. Ta depende di e statuut di e FOndo di Pension cu nan ta resorta bou di dje, ta bisa tambe. Pero asina mes ta ilogico cu bo ta stort placa den un fondo di pension, y bo no ta haya sa kico precisamente ta pasa cu e placa. Pero esaki Sr. de Cuba no ta den e fondo di pension aki so, pero den varios fondonan di pension, no tin mucho claridad kico ta pasa cu e placa.
Ultimo temponan a mira un mehoracion substancial den e fondo di pension di APFA, nan ta bin mas adilanti, nan ta purba di ta mas habri, pero no manera cu sindicato lo desea. E fondonan di pensionnan aki ta genera masha hopi placa mes, y pa nan genera, porcentahenan pa locual nan ta haya na entrada y e porcentahe ta bay bek na e pensioen di e pensionadonan ta un proceso cu mester cana su caminda. Pero den e caso akinan, sindicato STA a compronde for di e empleadonan di ASTEC cu no tin claridad ariba esaki. Pero Sr. Diego de Cuba a compronde cu e empleadonan tabata tin un caso den Corte y cu e pensionadoann di ASTEC mester bay haya un cierto cantidad di placa bek ariba nan pension. Sindicato STA lo mester bay wak si nan mester haya e placa bek cu forsa retroactivo, y ki dia esaki lo tuma luga.
Pero pa locual cu ta trata e miembronan cu ta trahando aworakinan na ASTEC , sindicato lo kier un claridad ariba e fondo di pension. Y e trahadonan tin e pregunta, ta con a para cu e fraude cu tabata tin den e fondo di pension. Y esaki ta un preocupacion basta grandi cerca e trahadonan, pa motibo cu ta un bon suma a bay eynan, cual tabata den careda di un miyon florin. E cifranan exacto no ta conoci cerca e sindicato. Y p’esey e reunion cu ASTEC diahubes awo, ta di suma importancia. Ta spera cu bin claridad den e asunto aki, y cu esaki por habri caminda pa firma un protocol, pa por cuminsa negocia un contrato colectivo mas pronto posibel.
Aruba tin diferente fondonan di pension, entre nan APFA. E fondo di pension di ASTEC a wordo lanta cu ayudo di e Hulandesnan, hopi aña pasa pa e trahadonan di waf. Y sindicato STA lo kier sa mas a fondo kico ta pasando cu e fondo aki, di e trahadonan di ASTEC, segun Sr. Diego de Cuba, di Sindicato STA.