Cuerpo di Polis di Aruba lo reuni proximamente cu Comisario Suplente, Sr. Andrew Hoo. Lider di sindicato SPA, Sr. Edgard Maduro, ta amplia ariba esaki.
E puntonan primordial pa SPA pa traha riba dje lo ta atencion riba e edificio di warda di polis, unidadnan di transporte y uniformnan. Pero despues di esaki otro puntonan lo bin dilanti pa haya un solucion tambe manera cu Justitiele Dienst tambe tin su preocupacionnan pa funcionamento den e warda y pa por haya personal.
E ultimo punto aki lo no ta bay asina lihe pa haya personal, caminda cu sindicato tambe tin un plan y nan lo sinta haci e huiswerk aki y sinta na mesa pa negocia te cu yega na un solucion.
Pa ultimo Sr. Edgar Maduro hefe di Sindicato di Polis a bisa cu Minister tin e ultimo palabra di cua funcionario lo ta den e condicion pa sinta na e posicion di Waarnemend Chef.
Cuerpo Policial ta di acuerdo con e decision di ken por bin, ken lo keda. Pero e responsabilidad di bira chef semper mester ta un persona cu por traha cu curason y yuda drecha Cuerpo Policial, siendo cu cuerpo policial ta traha pa sirbi otro y mester yuda entre coleganan .
E maneho di cuerpo di polis lo ta hopi importante y unda cu si e no por drecha e ora lo mester yega na un otro solucion. Sr. Maduro a haci enfasis cu ta un Cuerpo Policial so tin, unda cu mester traha uni y sin division y haci e trabou bon den un manera mas profesional. Si lo por tin algun diferencia di idea den e area interno di departamento lo mester wordo soluciona y pa cu esaki Sr. Edgar Maduro hefe di Sindicato di Polis a bisa cu lo bay reuni cu Minister tocante esaki.
Finalmente Cuerpo di Polis lo bin cu diferente plannan cu mas maneho den e parti di comunicacion pa cuida y yuda cu otro siendo cu cuerpo di polis mester percura pa siguridad di e pueblo, pero proteha mesun funcionarionan y duna resguardo y proteccion den e team unda cu Sr. Edgar Maduro tambe a expresa cu tecnologia lo mester bin hunga un rol importante pa Aruba no keda mucho atras den sistema di funcionamiento di polis.