guilfredbes

Sindicato SPA a haya un respuesta di parti di Gobierno cual nan no ta mucho contento cune. Sr. Guillfred Besaril a trece pa dilanti cu den un carta di 4 pagina cu Gobierno a manda SPA, a sinta ripiti dos biaha e mesun storia cu nan a bati e sindicatonan cune durante e tres reunionan cu a tuma lugar entrante Gobierno y gremio Sindical. Porcierto e reunionnan cu a dura masha largo y den cual e puntonan cu a bolbe wordo menciona den e carta a keda ampliamente discuti. Na final di e carta Prome Minister ta menciona cu door cu e Sindicatonan ta insisti di kier sigui reuni riba e tema, Gobierno di su banda tambe dispuesto na sigui reuni. Pues si no ta pa e instancia di e Sindicatonan, e tema aki lo ta un “Done Deal” pa Gobierno!
Pero, segun Sr. Besaril na momento di analisa e carta mas profundo, niun caminda Gobierno ta menciona nan disponibilidad pa duna algo pa compensa e perdida di poder di compra, cual ta 3.6%. E lider sindical ta sigui bisa cu porta su interpretacion ta robez of Hulandes ta un tanto “gebrekkig”. pero ta sinti e contenido di e carta como sifuera cu e GObierno actual ta manda bisa e gremio Sindical cu nan a haci ASINA HOPI caba pa e sindicatonan y empleadonan publico, cu eigenlijk e empleado publico y e Sindicatonan NO MERECE na sigui pidi nada mas. Alcontrario, e empleadonan publico mester reconoce con bondadoso e Gobierno aki tabata cunan y pone man na nan curazon.
Sr. Besaril, ta sinti esaki como un insulto, vooral si tene na cuenta cu Gobierno su practica durante e ultimo aña nan tabata di pone mas atencion na entre otro inversionan comercial ( proyectonan pa stimula nos economia a corto plazo, pero cu no tin un estudio kiko lo ta nan “Return in Investment”) y di duna esnan di menos entrada un ahustacion chikito (pa asina tene nan contento y nan no grita mcuho) y sigui laga esnan di un entrada modera “Clase Media”) sigui carga tur e golpinan economico di Pais Aruba. Alavez no ta baha nan gastonan y si ta permiti na duna cierto grupo di trahador (cu por bien ta cu oficial nan no ta ambtenaar mas, pero cu si ta ricibi nan salario directamente for di caha di Gobierno), un bunita aumento salarial plus un jugoso 13e maand. Riba e parti e lider Sindical ta sigui elabora di ta masha contento pa e grupo aki di trahador y ta felicita e Sindicato cu a logra e CAO pa nan, pero no por ta asina cu pa otro semper tin, pero pa ambtenaar nunca no por nada!
Pa sr. besaril ta Gobierno mester ta esun cu mester tene nan man na su curason! Si mira cuanto e empleadonan publico a ricibi di Gobierno den 3 aña (esta 5300 Florin), pero door di e perdida di poder di compra (3.6%), nan a wordo ranca un promedio di casi 2000 Florin, practicamente no por papia mas di un adelanto real pa e empleadonan publico. Sr. Besaril ta sigui remaraca cu den sector priva, ta conta pa esnan cu ta afilia na un Sindicato mane por ehempel STA of FTA, cu semper ta wordo negosha un forma pa compensa e perdida di poder di compra. E motibo principal tras di esaki ta cu tur hende ta consciente cu si no ahusta entrada di e empleadonan, dificilmente nan no por sigui mantene e mesun calidad di bida. Un trahador asina nunca por ta stimula pa duna 101%na pia di trabou.
E lider Sindical ta lamenta cu semper ora ta negosha pa e trahadornan den sector publico, semper ta haci como sifuera cu loke esector aki ta pidi no ta algo comun den por ehempel sector priva. Loke ta sucede den sector priva ta cu no ta tur hende ta afilia un Sindicato. Hopi di esnan cu no ta hacie ta netamente pa tempo, sin tene cuenta cu afiliacion ta un derecho di un trahador. Niun doño di trabou por kita un empleado paso e la afilia su mes na un Sindicato.
Sr. Guillfred Besaril ta finalisa bisando cu SPA su bestuur ta cla pa cana e caminda CU SU MIEMBRONAN indica nan. Pesey mes ta yamando pa un reunion cu Caracter di urgencia Diahuebs awor dia 20 di December pa 2:30pm atardi na Pova Club na Barcadera. “Den Man di e miembronan y no ta di directiva e GObierno actual ta!