Sra. Leila Escobar cu a bin di Venezuela ta splica di un curso cu a duna na miembronan di FTA pa siña conoce kico ta e meta di un sindicato.
Sra. Escobar ta bin di e Federacion Venezolano di Maestro y e ta na ARuba door cu FTA a diseña un programa pa tur su delegadonan, cu lo bay ta progresivo. E ta un curso basico, cual lo bay ta den tres grupo pa despues e siguiente curso basico II, y na ultimo na 2018 un formacion specialisa cual lo tuma luga na 2018.
Esaki ta e prome curso basico, nan lo siña kico ta e organisacion sindical, con e ta funciona y ken ta su integrantenan, cual ta e funcionnan di e delegado pa e por actua na su trabao. Tambe nan lo conoce den liñanan general, norma y statutonan, como tambe reglamentonan di FTA. Y e reglamento pa haci reclamo y en general riba e codigo y e ley di trabao, como tambe tecnica di auto formacion pa despues di esaki nan por haci algun revision di material di biografia pa nan ta up to date.
Sra. Escobar a sigui splica cu e delegadonan nan lo tin practica di oratorio y despues un practica riba temanan sindical y con pa negocia. Esey lo wordo splica den e siguiente dianan.
Ya tin un grupo cu a pasa e curso basico I. E idea ta pa pone tur e delegadonan pasa e curso basico II.
Pa e delegado ta primordial pa tin conocemento di sindicalismo. Ya cu ora cu nan wordo eligi, e miembronan ta pone nan confianza y responsabilidad den nan delegadonan. Y e delegadonan mester ta prepara pa negocia y responde na cualkier situacion cu presenta na pia di trabao y pa esey e personanan mester ta capacita. E mester sa cua ta e leynan cu ta proteha e delegado y su coleganan na trabao, segun Sra. Leila Escobar.