Hedging tabata un tema cu te awe ta ser papia di dje. Esaki a pone cu WEB NV a aumenta e costo di awa y coriente a subi te cu e fecha di awe. Sr. Luis Oduber ta splica kico lo bay pasa cu esaki despues cu e hedging caba e aña aki.
Ainda tin un parti di e fuel oil cu ta mara na un prijs, di mas o menos 42%. Esaki lo tuma caba dia 31 di December 2017. Ainda no ta conoci kico lo bay sosode despues di esey. Tin discusionnan tumando luga cu e accionistanan di Utilities. Ultimo palabracion tabata cu prome cu tuma un decision lo bay bek parlamento y te ainda esaki ta e caminda cu lo mester sigui cana. Si e decision cay cu e hedging no ta bay continua, esey lo kiermen cu WEB NV lo ta susceptibel na e prijs di fuel oil.
Segun Sr. Oduber, tin diferente manera di haci hedging y tin lesnan cu mester wordo siña. Hedging ta solamente un seguro practicamente cu bo ta cumpra pa un cierto prijs. Por haci’e tambe cu ta paga un tarifa y bo ta pone un maximo ariba dje. Si e prijs subi, ta yega te eynan tin garantia cu no lo paga mas hopi, pero lagando e parti abao habri.
Por ehempel si e prijs di petroleo baha te na 10 dollar, por saca probecho di dje. Bo ta paga un prima un tiki mas halto cu esey, compara cu si cumpra un faha cu entre 2 diferente prijs, si e subi mi ta keda para eynan. Pero si e baha, mi ta keda mara na e prijs halto cu a mara na dje. Ta paga un prima mas abao, pero esey kiermen tambe cu no ta bay probecha di e prijsnan mas abao tambe. Banda di esey ta depende tambe cuanto ta hedge di e consumo local.