Dia 12, 13 y 14 di September benidero, Fundacion Gobernacion di Calidad Aruba (FGCA), den cooperacion cu Universidad di Aruba (UA) lo organisa su prome simposio. Tema: ‘E caminda pa bon gobernacion’. Durante 3 anochi (7-9 p.m.) 3 presentador lo duna un imagen di e situacion actual na Aruba y e otro paisnan di Reino, e cambio necesario cu mester tuma luga, kico nos por spera si di berdad tin bon gobernacion y con nos mes por aporta n’esey. FGCA y UA ta spera cu e simposio lo aporta na concientisacion di pueblo di Aruba pa cu calidad di gobernacion y e propio responsabilidad di cada ciudadano Arubano den esey.
Segun presidente Armand Hessels di FGCA e atencion di FGCA te awor tawata dirigi specialmente na exposicion di situacion di mal gobernacion. Pesey (t)a compila rapport investigativo cu ta duna un bista di e maneho di gobierno riba varios tereno durante e ultimo 30 añanan. Pero e meta principal ta pa yuda realisa bon gobernacion. Esey solamente ta posibel si ciudadano ta consciente di e efectonan negativo di mal gobernacion. Pero ta mas importante ainda pa duna un imagen di consecuencia di bon gobernacion pa ciudadano y comunidad. Al fin y al cabo ciudadano mester scoge conscientemente con nan kier pa e pais wordo goberna.
Presidente Hessels ta contento cu e atencion cu mayoria di partido politico ta duna den e campaña actual na bon gobernacion. Cu excepcion di un solo partido, tur partido kier pone bon gobernacion como nan guia. Esey ta un desaroyo hopi positivo. Awor ta trata na ehecuta e desaroyo aki concretamente. Hessels ta spera cu FGCA tambe por duna un aporta n’esaki.
E idioma di comunicacion na e simposio lo ta Ingles. A scohe p’esaki pasobra mal gobernacion y corupcion ta fenomeno internacional cu tur caminda ta conta cu resistencia creciente pa motibo di e consecuencianan catastrofal pa comunidad. Cada bes mas ta combati esaki na un manera organisa; sa kita gobernante y asta presidente di nan tarea y sa sentencia nan pa corupcion. E desaroyonan na Aruba no ta keda atras.
Prijs di ticket lo ta Afl. 100,- y ta duna acceso na tur tres anochi. Mester registra on line y por cumpra ticket for di mitad di siman na UA na Sasaki (banda di Crown). Ademas di e presentacionnan cu ta sigui un liña cora, tin (en especial e ultimo anochi) amplio espacio pa pregunta y discusion. Hessels ta spera entre otro cu tur partido politico lo haci uzo di e oportunidad aki pa bay den dialogo cu e publico presente pa indica con nan lo pone bon gobernacion concretamente den practica.