SIMAR a tuma nota di e comunicado di Gobierno di Aruba encuanto di e tarifa di cobransa di SELIMAR entrante 1 di juli 2018, despues di a sinta na mesa cu sindicatonan FTA, UEA y ALVAST. SIMAR ta cuestiona e decision y e forma con ta bay cobra esaki. Ta di aplaudi cu FTA a lucha pa bin cu un tarifa social. Gobierno anterior kier a bin cu un tarifa pa recoge desperdicio. Awor Minister Otmar Oduber ta sinta cu 3 sindicato so y ta yega na un tarifa di 0 florin pa 90 florin pa recogemento y maneho di desperdicio.
SIMAR ta di acuerdo cu mester bin na un solucion pa recogemento di sushi, pero no ta aprecia cu Minister Oduber a sinta cu algun sindicato y conhuntamente a yega na un bracket di tarifa cu no ta nada social y na un forma dictatorial. Tambe a bin cu e decision pa hinca esaki den belasting cu ta haci esaki obligatorio pa cada ciudadano. Maestronan entre otro lo sali un biaha mas perhudica, siendo cu costo di bida a subi drasticamente e ultimo añanan mientras cu nan tin añanan ta warda riba un aumento salarial. Alabes tin hopi ciudadano cu tin contract cu companianan priva y ta opina di ta ricibiendo miho servicio. Kico lo bay pasa cu esaki? Nos por a compronde di gobierno cu e ciudadano lo tin 2 debe e ora. Esaki absolutamente no por!! Den un pais democratico NO ta duna e ciudadano espacio pa por scoge cu cual compania e ta cera un contracto pa recoge desperdicio? SIMAR a tuma nota di e tabel di tarifa. Nos por ta social, pero SIMAR no ta di acuerdo cu esunnan cu tin sueldo minimo no lo mester paga. Si nos wak e ultimo encuesta di CBS Aruba e mayoria di nos poblacion ta riba un sueldo minimo. Esaki kiermen cu esunnan cu tin un titulo of un bon trabou cu ta paga mas ta wordo castiga pa esaki? Si tin cu paga pa recoge desperdicio, ta tur hende cu ta produci esaki lo mester paga pa esaki. Lo mester bin cu e tarifa super social pa esunnan riba entrada social, pensionadonan y tarifa social pa tur e otronan cu no ta cay den e tarifa aki. Tambe lagando e espacio pa cada ciudadano scoge cu cua compania e lo kier tin contracto cun’e. Banda di tur esaki SIMAR lo kier haya mas informacion for di e minister tocante e cuido di privacidad di ciudadanonan.
No tin placa ni espacio pa trata Restructuracion Salarial di Maestronan, cu NO TA UN AUMENTO, sino ta un DERECHO, pero e salario di e maestro si a keda tranca pa añanan largo. Pero awo mester tende di tur aumento cu gobierno kier bin cun’e, mientras e salario ta keda mescos. E maestro, mescos cu mas ciudadano cu miho entrada ta paga mas belasting y ta gasta mas contribuyendo na economia di nos pais. Semper ta e mester keda contribui mientras cu e tin mas di 25 aña sin conoce un adelanto den su salario?
SIMAR ta cuestiona cu Minister Otmar Oduber no a bin na mesa cu demas sindicatonan y gremio pa discuti e proposicion y efectonan di un asunto asina importante pa bienestar di nos pais. SIMAR no ta contra e lucha di FTA cu pa añanan ta purba yega na un tarifa social. Pero sigur ta cuestiona e forma dictatorial cu e minister a scoge pa hinca esaki den belasting pa FORZA e ciudadano pa paga esaki, kier of no. E decision tuma ta mustra di a wordo haci demasiado lihe, sin investigacion ni studio suficiente.
Directiva di SIMAR ta di acuerdo cu mester bin na solucion pa cu existencia y trabou di SERLIMAR y pa cuido di nos pais, pero no na e forma aki.