Simar lo entrega e firmanan colecta pa e tema di airco pa scolnan na Aruba, segun Sra. Maroescka Cornelie di Simar.
Na September 2017 tabata tin un ola di calor, caminda cu hasta muchanan mester a wordo manda cas. A lanta un comision y e comision aki a colecta un gran cantidad di firma y esaki lo bay wordo entrega den curso di otro siman. Durante e accion aki, a haya hopi informacion, di coleganan, di cosnan cu a tuma luga den temporada di calor y nan a haya sosten tremendo di e veld. Nan a haya sosten di mayornan y publico en general pa e accion aki. Y awo SIMAR ta cla pa entreg’e y minister ta na altura. Dia 24 pa 2 or y 30 lo aglomera ariba e plenchi Shon A. Eman pariba di Parlamento, unda lo bay entrega e carta y e firmanan. Dene carta ta pidi pa e minister institui un comision y traha ariba e posibilidad pa tur scol cu no tin airco y e gymzaal, pa haya esaki mas pronto posibel. Den e carta ta menciona pakico airco ta importante y airco no ta un luho, pero e ta necesidad, mas aun, e ta un derecho.
Dene carta ta haal aan dos fragmento di ley, caminda ta bisa cu siguridad di e trahado ta importante y e ta menciona e temperatura den cual e trahado mester traha, cual no ta cuadra cu e temperatura na Aruba, pio durante di temporada di horcan, cual lo cuminsa bek aki tres luna.
Ta haci un apelacion na tur colega den veld, bin pa hunto haci esaki, pa mustra con importante e ta , pa mustra cu e no ta wega. Esun cu ta para den candela, ta esun cu sa miho. Ta pidi sosten di esunnan cu tin airco, pa ta presente tambe, ya cu esaki ta mustra solidaridad. Tin cu bisa tambe cu a mik ariba por lo menos 65% di e veld y nan a yega y pasa e 65% di firma. Ta un lastima pa menciona, cu algun director no a coopera. No tabata nada cu nan no ta duna sosten, pero mas bien un temporada cu politica tabata hunga un rol, cultura di miedo ta hunga un rol y tambe individualismo. Hasta a haya hende cu a bisa cu nan mes a traha pa nan airco, dus cu no ta sostene algo asina. No tur scol tin e capacidad of forsa pa haci esaki. Pero lo focus ariba e parti positivo , cu a logra y ta cla pa entrega e firmanan na minister Lampe.
E comision no a bay ainda ariba kico ta e consecuencia. Loke si a bin dilanti prome cu e comision a nace ta si no bin nada di parti di gobierno, lo mester pensa den un direccion diferente. Awo ta bezig ta pensa ariba un nivel positivo. A haya reaccion positivo, aunke e ta keda un reto pa e minister di Enseñansa actual ya cu e situacion financiero no ta mucho di gaba. Pero SIMAR ta kere si ta traha cu ley, unda ta bisa cu trahado su siguridad ta importante, e ta bisa claramente tambe cu gastonan di tur loke ta wordo uza den un scol cu e ta directamente bou di gobierno of no, ta gobierno mester cubri’e y nan lo exigi pa esakinan wordo cumpli.
SIMAR ta consciente cu e instalacion di airco no ta bay den un chupa di dede, pero loke ta pidi den e carta ta pa minister sondea e posibilidad pa wak kico por haci pa tur scol tin un overdekte y pa tur scol tin airco, segun Sra. Maroeschka Cornelie, di sindicato SIMAR.