E structura di Aruba ta Indica cu ta den e fase blauw y e lider di e OT lo ta un representante di Brandweer Aruba.
E representante di e 8 clusternan a sinta hunto cu e liaisonnan Marina Real, Kustwacht y como consehero un representante di Bureau Rampenbestrijding Aruba.
Cada cluster a trece puntonan di atencion dilanti cualnan tin mester un desicion for di e BT (Beleidsteam).
Dialuna mainta pa 8am e BT lo sinta. Ora cu un reunion di BT wordo yama e Prome Minister di Aruba lo guia e reunion aki. Demas miembronan cu ta forma parti di e BT ta e 4 directornan (of nan suplente) cu ta responsabel cu e procesonan, liaison-, consehero- y Secretario di Conseho di Minister.
Durante e reunion lo busca solucion di e puntonan di atencion cu e OT a compila.
Locual cu lo sigui segun e scenario;
E horcan a subi di categoria 1 pa 3. Esaki ta duna indicacion cu e daño cu horcan lo causa ta bay ta bastante.
Aruba a wordo poni bou di un hurricanewatch. Caminda cu tur instancianan mester cuminsa tuma nan accionnan necesario pa asina yuda na preveni mas daño y tambe pa ta prepara pa duna e ayudo necesario na e comunidad.
Prome Minister di Aruba lo informa e comunidad di Aruba riba e desaroyo y alabez lo pidi tur hende pa tuma accion y/of medidanan necesario pa cu e yegada di e horcan.
Tambe prensa di Aruba lo keda informa regularmente riba e desaroyo y preparacionnan cu ta tumando luga.
Actualmente ya caba tin instancianan cu ta participando na e simulaclo aki cu ta ehecutando nan tareanan den e fase di preparacion. Entre otro ya caba DOW a laga haci limpieza na Palm Beach y Zeewij. Tambe nan a reuni cu nan cluster pa atende e situacion.
ATA ya caba ta den e fase pa evacuacion di 14000 turista cu ta na Aruba y ta trahando hunto cu airport y demas partnernan.
Sociale Zaken ta bezig cu su partner Rode kruis pa cu preparacionnan.
Polis tin su plan activa y ta ehecutando nan procesonan.
Departamento di Salubridad tambe a informa su miembronan di cluster pa asina esakinan activa nan plan.
WEB tambe a activa nan plan y nan demas miembronan di cluster.
Departamento di Aviacion Civil su cluster tambe a activa nan plannan y aki na waf ya caba den e fase aki a pidi tur barco y botonan pa bandona Aruba. Tambe tur barco hancra den nos awa territorial a wordo pidi pa bandona e area pa motibo di e horcan.
E liaison Marina Real y Kustwacht tambe ta standby pa duna ayudo y nan tambe a activa nan plan.
Attachments