Pa ASKA Holding N.V., e kompania ku ta konsistí di ASKA Holding N.V., ASKA Schadeverzekering N.V. i ASKA Levenverzekering N.V., 2017 a resultá un aña eksitoso ku resultadonan súmamente positivo. E direktornan di e kompanianan di seguro akí ta orguyoso di por presentá e sifranan positivo reflehá den e kuentanan anual ouditá di kada kompania. Basá riba e sifranan di ASKA Schadeverzekering N.V., direktor Omar Salazar ta indiká ku tabatin un oumento den ingreso di prima i un resultado positivo pa e divishon akí. Den kaso di ASKA Levenverzekering N.V., direktor Elsirha Isenia-Scope tambe ta ilustrá un oumento di ingreso di prima i un resultado positivo pa e divishon di Bida.
ASKA Schadeverzekering N.V.
ASKA Schadeverzekering N.V. for di mei 2017 ta bou di enkargo di direktor Omar Salazar. Den 2017, e kompania tabatin un bèrdadero turnaround kompará ku e aña anterior. Segun señor Omar Salazar, tin tres motibu prinsipal pa e turnaround di e sifranan di ASKA Schadeverzekering. E promé motibu ta un redukshon di e provishon pa kuentanan ku mester kobra, siguí pa redukshon di gastu i por último, e kompania a benefisiá hopi di un mehorashon den kobransa di prima, kombiná ku un subida den produkshon total.
Omar Salazar ta kontentu ku e kresementu den e resultado finansiero. Esaki ta nifiká ku danki na e esfuersonan èkstra ku e tim di ASKA a desempeñá i konfiansa di tur e kliente i partnernan stratégiko di ASKA, 2017 a sera ku un ganashi neto di NAf 300 mil.
ASKA Levenverzekering N.V.
Direktor di ASKA Levenverzekering N.V., señora Elsirha Isenia-Scope ta enkargá for di ougùstùs 2016 ku mando di e kompania di Seguro di Bida. Komo resultado di e rumbo ku e divishon akí a drenta for di e tempu ei, por mira ku pa 2017 tabatin un oumento den e ingreso di prima.
Señora Elsirha Isenia-Scope tambe ta kontentu ku e esfuersonan pa mehorá servisio, produkto i prosedura den kuadro di e reorganisashon i restrukturashon di ASKA a resultá den un kresementu ku un resultado positivo di Naf 1.0 mion na ganashi. E direktor ta yama danki pa e konfiansa den e divishon di seguro di bida i penshun di ASKA.
ASKA Holding N.V.
E resultadonan di Schade i Leven ta duna resultado positivo di NAf 1.2 mion pa ASKA Holding den 2017. Gerensia di ASKA Holding N.V. ta rekonosé e desafíonan ku e kompania ta enfrentá ainda. E intenshon ta pa ASKA sigui traha ku otro institushonnan di e sektor privá i di gobièrnu pa aportá na ekonomia. E ophetivo di e kompanianan di seguro akí ta pa kontribuí na benefisio duradero di e kliente, akshonista i komunidat di Kòrsou.
Proyekshon pa ASKA 2018
Segun proyekshon, e posishon finansiero di tantu ASKA Schadeverzekering N.V. komo ASKA Levenverzekering N.V. ta keda sólido tantu pa e divishon di ‘Schade’ ku ta akapará seguro kontra daño, komo pa ‘Leven’ ku ta akapará seguro di bida i penshun.
Durante 2018, tur dos kompania ta sigui enfoká riba reorganisashon korporativo, konservashon komersial i mehorá e prosesonan pa impaktá e desempeño fiansiero i kondishon finansiero general di ASKA positivamente.