Departamento di impuesto ta informa na tur esunnan cu ta bende su auto pa corda kita e plachinan di number y e sticker for di e auto.
E number ta registra riba bo nomber y e number di e sticker ta registra riba bo recibo di pago. E sticker ta un comprobante di pago mescos cu e recibo.
Tanten cu e number ta registra riba bo nomber, bo persona ta keda responsabel pa e belasting di vehiculo di motor. Pues, nos lo keda cobra e belasting cerca bo persona si no haci e cambionan necesario cerca nos.
Pesey, no laga otro persona uza e plachinan, pasobra nan no ta bay paga e belasting pa bo (hopi biaha nan ta gaña bo) y si algo pasa (p.e. atraco) ta cerca bo polis ta yega prome.
Pa por pasa e number riba nomber di un otro persona, mester haci esaki por escrito cerca nos. No tin otro forma pa haci e traspaso. Si no ta bay uza e number mas, please pasa cerca nos y entrega e plachinan bek.
Si laga e auto bay cu e sticker, esaki ta habri caminda pa mal uzo di un comprobante di pago cu ta di bo.
Sea consciente di e consecuencianan y sea atento ora di bende bo auto.