Actualmente como Dialyse Verpleegkundige, Eromil Bakmeyer, miembro di Plataforma Politico Pueblo Orguyoso y Respeta (POR), e ta tene su mes hopi bezig cu pashentnan cu tin diabetes y ta duna diferente guia na personanan diabetico. Prome cu el a tuma e reto di bira un dialyse verpleegkundige, e tabata traha como junior project manager na Botica di Servicio unda cu e tabata encarga cu e clinica di diabetes. Pues for di e tempo ey caba mas o menos 10 aña pasa el a cuminsa cu e parti di diabetes unda cu e tabata tene consulta cu pashentnan diabetico.
‘Si mira e cifranan aki na Aruba, bo lo tuma nota cu cifra y porcentahenan ta keda subi den e cantidad di pashentnan cu diabetes. Consecuentemente hopi biaha e mesun pashentnan cu mi tabata wak den e clinica cu tabata diabetico, awo mi ta wak cu ta pashentnan cu a bira di dialyse. Si Wak e cantidad di personanan cu sobrepeso, esaki tambe ta aumentando hopi aki na Aruba anto cu esaki e malesanan cronico tambe ta subiendo drasticamente. Mi ta premira cu si cosnan sigui asina y si no bay haci algo den e area aki pa loke ta prevencion, costo di AZV lo sigui crece y nos no lo por keda sin pone un “price tag” e ora cu esey. Pesey ami ta para pa e parti di prevencion, educacion, guia y duna structura na nos pueblo, esakinan mester bira un parti cu tambe ta cay bou di AZV.’
Manera menciona anteriormente, cu casi 10 aña bezig den e tereno aki na Aruba, mi a duna presentacion diferente caminda pa purba atende cu e problema cu ya for di e tempo cu mi a cuminsa mi a tuma nota cu e lo a bira un problema grandi. Mi ta keda bisa tambe cu e lo bira un problema hopi mas grandi si no pone atencion na prevencion. “Pues ora cu mi a wordo acerca door di lider di POR Otmar Oduber pa mi subi lista, e hecho cu el a tuma e parti di prevencion como un punto hopi importante, esey a hala mi atencion di biaha. Netamente como cu e trabou cu mi ta haciendo ta parti di prevencion. Awo riba un lista politico mi por eherece e mesun funcion riba un plataforma mas amplio y mi lo por tin mas influencia pa cosnan por cambia pa bienestar di e pueblo di Aruba.”
Banda di e aspecto di prevencion pa loke ta salud, otro interesnan cu sr. Bakmeyer tin,ta encera derechonan di mucha en general. Mester para keto na tur derecho di mucha unda cu tin decreto internacional di Unicef. Nos mester cuminsa educa nos muchanan riba kico ta nan derecho, mester cuminsa siñanan y haci nan consciente cu nan tin cierto derechonan, pero con ta atende cu esakinan tambe. Por ehempel nan tin derecho di opinion, y nos mester por siñanan cu nan por forma nan opinion a base di hechonan entre otro y abase di esey nan derecho tin cu wordo respeta. Banda di esaki abuso sexual, mental, fisico, emocional etc. tur ta cay bou di e derecho di mucha cual mi ta kere cu nos tin un tarea grandi pa haci ainda na Aruba. Departamentonan social den e caso aki mester traha mas hunto specialmente den caso cu un mucha ta un victima pa e procesonan por cana den forma mas structura.