Gobierno di Aruba y especialmente Minister di Justicia Drs. Mr. Arthur Dowers sigur no ta pasando den su mihor temponan. Fuera cu tin preocupacion y critica serio y funda contra su maneho cu a pone cu tin un escalacion serio di criminalidad ariba Aruba, awe merdia pa 2’or y 30 Orden di Abogado ta convoca un conferencia di prensa pa asina duna splicacion di un welga pa loke ta abogadonan cu ta keda asigna den e asina jama “piket” pa traha como abogado Pro Deo den casonan penal.
Derecho di abogado y derecho di abogado liber.
Cada persona cu keda deteni pa autoridad relaciona cu un of otro hecho penal tin derecho riba un abogado y si e no por paga pa esaki e ta keda cu e derecho di hanja un abogado liber, esta un abogado Pro Deo. E sospechoso tin tambe e derecho di por consulta cu e abogado promer cu e drenta den e 6 oranan di interogacion, mas tambe e tin derecho riba presencia y consulta di su abogado durante e promer y sigiente interogacionan.
Conflicto:
Abogadonan cu ta duna e servicio Pro Deo ta ricibi un pago di apensa 900 florin pa tur nan trabaonan mientras cu e summa aki a keda acorda desde 1997. Despues di esey e Codigo di Procedimiento Penal (Wetboek van Strafvordering van Aruba) a keda ahusta na multiple occasion poniendo trabaonan extra pa e abogado encuestion. Mas tambe mescos cu cualkier empresa, abogadonan tambe a bin ta sinti e aumento barbaro den tur loke ta e gastonan di operacion, logistica y otro gastonan cu sigur ta di importancia pa nan por sigi rindi nan servicio. Abogadonan Pro Deo no ta abogadonan di gobierno pero abogadonan particular y tin informacion cu tin mas di 40 abogado cu lo tin contract cu Gobierno di Pais Aruba pa por duna e servicio Pro Deo.
Aumento di 100% no ta nada nobo:
Mescos cu tur otro partner den Reino, abogadonan di Aruba tambe ta mira cu a jega tempo pa hasi e ahustenan ya cu ta Gobierno ta esun cu a trece cambionan den e Codigo di Proceduranan Penal y na tur otro partnernan den Reino e ahuste aki ya ta vigente. No honra e ahustenan aki manera cu e Orden di Abogado a propone na gobierno mas cu claro e responsabilidad y consecuencianan ta keda pa Gobierno ya cu esaki ta crea un empugna serio contra e Derechonan di cada Sospechoso. E derecho di un “Fair Trail” ta hopi escencial y sin esaki casonan ta keda rechasa den Corte y tur esaki lo pisa mas contra Pais Aruba.
D-Day:
Pa awe 2’or y 30 di atardi Orden di Abogado a convoca un rueda di prensa unda cu nan lo bai anuncia kico exactamente ta bai ta nan pasonan ya cu ta desde luna di Mei di e aña aki nan a manda un carta pa Minister di Justicia Drs. Mr. Arthur Dowers y ta den medionan di prensa nan a bin tende un reacion e Minister pero sigur no un solucion pa e situacion actual.