Diahuebs Corte den Prome Instancia a dicta sentencia den caso di tiramento riba un auto cu tres persona abordo den Sabana Basora y tambe di maltrato cu arma. E mesun duo aki tambe ta wordo acusa di a kibra e windshield patras di e auto caminda e tres personanan tabata aden.
E caso contra di e hoben A.G.S. ta un tiki mas serio, ya cu el a wordo acusa tambe di a tira riba un hoben y su tata, pa cual fiscal di acusa A.G.S. di intento di asesinato y tambe maltrato severo cu arma. Ademas di esaki, fiscal a exigi tambe pa ehecuta e tres luna di prison condicional pa A.G.S. pasobra el a viola su libertad condicional door di a haya problema un biaha mas cu husticia den su periodo di prueba.
Tur dos acusado ta nenga cu nan a tira, pero tabata tin tres testigo cu a declara cu nan tabata den cura y a skucha tres tiro. Hues a mustra cu Polis a haci investigacion na e auto y a haya impactonan di bala.
Hues a mustra cu e otro acusacion ta contra G.S. Esey ta cu riba 4 Augustus 2016 el a tira riba dos persona. G.S. a desmenti esaki tambe y a bisa cu e ta haci uso di su derecho di silencio.
Hues a mustra cu G.S. a yega di worde castiga na Juli 2015 pa ladronicia, tabatin un parti esta 3 luna condicional cu un tempo di prueba di 2 aña. Fiscal awor ta pidi pa pone e castigo aki acerca di e castigo cu e lo haya.
Hues a mustra cu tin un rapport di Reclassering, y a base di esaki el a haci G.S. algun pregunta. G.S. a bisa hues durante tratamento di caso cu e tabata traha construccion cu su tata y tabata biba na un ruma di dje. Hues a bisa cu segun Reclasering su raport, tin peliger cu G.S. lo bolbe haci e mesun cos y ta haya cu G.S. mester di guia di Reclasering.
Ta asina cu for di 13 Augustus 2016, G.S. ta cera. Fiscal a puntra G.S. kico ta su plannan pa futuro. Segun G.S. e kier traha pa cria su yiunan.
Pa loke ta C.M., Hues a mustra cu C.M. tabata den Formacion Social. Segun C.M. e tabata bayendo bon. Dia 6 September 2016 el a worde deteni. Hues a mustra cu C.M. tambe tin carchi di castigo pa ladronicia. E ta bibando cerca su mama. Hues a puntra kico C.M. lo haci ora e sali. Segun C.M. e kier sigui e Formacion Social of un programa pa e por haya trabao.
SENTENCIA
A.G.S. a wordo haya culpabel di intento di asesinato riba tres persona, y tambe pa destruccion, pa cual el a wordo condena na 7 aña di prizon, incondicional, kitando e tempo cu el a pasa caba den aresto preventivo, mas e tres lunanan di su periodo di prueba cu el a viola.
C.M. a wordo haya culpabel di ta complice di destruccion y tambe intento di asesinato, pa cual el a wordo condena na 4 aña di prizon, incondicional, kitando e tempo cu el a pasa caba den aresto preventivo.
Mester remarca cu un di e partidonan perhudica tabata den Corte, pa skucha e sentencia di Hues. Na final, C.M. a cuminsa tira palabra p’e pa cual miembronan di CEA a bay cun’e mesora for di sala.