Durante un conferencia di prensa yama pa Servicio di Impuesto a splica riba e mal informacion cu Insel Air ta duna den prensa pa cual aki Sra. mr. Luenne Gomez – Pietersz, Directora di Departamento di Impuesto ta splica.
A tuma luga un reunion extenso caminda Minsiter di Finanzas Sr. Bermudez, Minister di Transporte y Turismo Sr. Mike de Meza tabata presente como tambe representantenan di Insel Air. Y tambe e situacionnan di e avionnan cu ta riba tera.
Sra. mr. Luenne Gomez- Pietersz a splica cu Departamento di Impuesto no tin nada di haber cu e avionnan di Insel Air ta grounded, ya cu esey ta resorta bou di Departamento di Aviacion Civil. Autoridad di Departamento di Impuesto ta toca loke ta belasting y tin palabracionnan haci cu Insel Air y ta wardando riba confirmacion di Insel Air, ya cu tin un vindishi planea.
Tin palabracionnan haci, cu manera Departamento di Impuesto haya informacion di e grupo cu ta bezig cu un plan di rescate, y tambe e grupo cu ta bezig cu un plan stabilisacion e vindishi lo por wordo posponi, cual ya caba ta den planes. Ta wardando ariba e confirmacion di e grupo di rescate.
Departamento di Impuesto ta bezig for di algun tempo caba cu Insel Air caminda tin cierto palabracionnan haci, y Insel Air a demostra di nan banda y a cumpli cu palabracionnan. Ora e avionnan a wordo geground, esaki ta pone un cierto presion ariba nan operacionnan. Door cu e avionnan no ta bula, no tin entrada y e situacion ta bira un tiki mas preta. Tin cierto retrasonan den palabracionnan, pero Departamento di Impuesto ta spera cu nan por sali for di esaki.
Sra. mr. Gomez – Pietersz a sigui splica cu nan tin beslag poni ariba cuentanan di banco di Insel Air, y tambe ariba nan inventaris. Si Departamento di Impuesto haya e confirmacion di palabracion manera palabra, lo pone esaki den medionan di comunicacion, cual ta e parti normal. E directora a splica cu e proceso ta igual cu tur pagado di belasting, na momento cu no ta cumpli cu debernan fiscal. Esaki ta un proceso cu ta sigui su caminda. Si yega na un areglo, semper ta duna un prolongacion pa por yega na cierto palabracionnan.
Directora di Departamento di impuesto a splica cu no por duna detayenan di e suma cu Insel Air debe. Ta pa e falta di cumplimento di parti Insel Air cu su trahadonan nan belasting por tin boet pa esaki den nos di ley segun Sra. mr. Luenne Gomez – Pietersz, Directora di Departamento di impuesto.
Gobierno di Corsou a duna su cooperacion pa yuda sanea e situacion y Sra. mr. Gomez-Pieters z ta spera cu nan por cumpli cu belastingdienst y loke tin di retraso di nan pago. Directora di Departamento di Impuesto ta splica cu no por duna informacion di cuanto e debe di Insel Air ta. Mester tene cuenta ora ta trata cierto tipo di impuestonan cu ta wordo reteni di trahado, cu no ta yega di e compania. Ta importante pa menciona, y ta conta pa tur compania cu ta haci operacion aki na Aruba, na momento cu retene e placa di loonbelasting for di un trahado, mester draag esaki af na Belastingdienst y no ta cash flow cu por uza esaki pa inverti den negoshi.
Directora di Departamento di Impuesto kier sigura cu e trahadonan di Insel Air por sigui, cu e operacionnan por sigui y asina ey por duna un poco mas espacio pa haci e cambionan necesario pa nan sigui bula. Esaki ta un trayecto apart ya cu Departamento di Aviacion ta bezig cu Insel Air pa nan por cumpli cu nan rekisitonan tecnico y esun di Departamento di Impuesto ta un rekisito separa.
Ora un afdracht no tuma luga, Departamento di Impuesto semper tin e posibilidad pa haci un audit, un boekenonderzoek si enberdad e afdrachtennan a tuma luga manera debe ser y si esaki no ta e caso lo por pone un boet di 25%, 50% of te hasta 100% di e suma cu no a draag af na belasting.
Sr. van Spaandonk y Sr. Kluivert di Insel Air a wordo yama pa un reunion, den cual a yega na un commitment ora cu a splica di e situacion cu nan ta aden. Y Sra. mr. Luenne Gomez- Pietersz a keda masha sorprendi cu e declaracionnan cu a sali den media, cu ta belastingdienst a pone e avionnan na tera. Belastingdienst no tin nada de haber cu rekisitonan tecnico di un avion, esey ta competencia di Departamento di Aviacion. Loke nan kier sa, ta con por yega na un solucion pa cu belasting.
E grounding di avionnan a tuma luga for di luna pasa y e palabracionnan ya caba tin lunanan caba andando, segun Sra. mr. Luenne Gomez- Pietersz a splica.