Resultado di investigacion aki lo duna un indicacion di e composicion di desperdicio residencial di casi 40 mil cas
Pa mas 60 aña largo a deposita desperdicio di cas y tur otro tipo desperdicio cu ta wordo colecta na Parkietenbos cu actualmente a yega un haltura di 50-meter cu ta cubri un area di 16 hectare. Serlimar S G ta na altura cu e deperdicio cu ta wordo produci na Aruba no por keda wordo deposita mas ariba Parkietenbos. Parkietenbos a yega su maximo capacidad. No obstante, prome cu introduci tecnologianan nobo pa cu maneho di desperdicio, mester haci investigacion di e tipo y e composicion di e desperdicio cu tin actual.
Serlimar S G a cuminsa den luna di juli cu investigacion di desperdicio solido residencial. E investigacion aki a wordo organisa y ta conduci pa “Marine Biologist” Anastacia “Stacy” Brete, cu ta specialisa como “Beheerder van gevaarlijke stoffen en product kwaliteit” na Serlimar S G. E investigacion aki ta wordo conduci a base di metodonan di prueba estableci pa organisacion internacional “American Society for Testing and Materials (ASTM). E metodonan aki ta pa determina specificamente e composicion di desperdicio a base di categoria y peso.
Durante un periodo di 1 luna lo haci investigacion di 2000 kilo di desperdicio solido residencial, cu lo wordo separa y e peso lo wordo documenta di cada categoria di componente di desperdicio. Stacy Brete ta e persona cu lo conduci y monitoria e investigacion aki, caminda conhuntamente cu su ekipo specialisa lo separa y pisa tur e diferente categorianan di desperdicio. Durante investigacion aki nan lo ricibi 5 truck pa dia, caminda cada truck lo trese alrededor di 100 kilo di desperdicio solido residencial pa wordo separa, pisa y al final ta deshaci di esaki na un forma responsabel.
E categorianan di deperdicio cu ta wordo separa pa e investigacion ta; 7 tipo di plastic, glas (tur tipo), textil, metal, grofvuil (mata, sushi, cuminda), papel y carton. Cada categoria di desperdicio tin un baki limpi cu ta numera caminda e ekipo por deposita cada tipo di desperdicio debidamente. Na final di acumula y deposita e categorianan di desperdicio, ta pisa e bakinan individualmente cu e sushi y esaki ta wordo documenta. Despues di wordo pisa, e bakinan ta wordo haci limpi y bashi, y ta wordo pisa un bes mas pa controla e peso orginal di e baki. Na final di e investigacion Stacy Brete lo haci un analisis y traha un rapport, caminda e resultadonan lo revela e composicion actual di desperdicio solido residencial. Cu e resultadonan aki por continua cu investigacion mas profundo en conexion cu tecnologianan nobo pa implementa pa cu maneho di desperdicio responsabel y sostenibel na Aruba. E plan ta pa continua cu e investigacion pa asina crea un “data-base” di composicion di desperdicio no solamente residencial, pero pa tur otro tipo di desperdicio cu den futuro mester wordo procesa y maneha na forma responsabel.
Serlimar S G ta orguyoso di su ekipo cu ta traha duro pa cu desaroyo di maneho di desperdicio y ta haci posibel cu nos compania ta sigui bai dilanti. Resultado di e investigacion aki lo wordo publica riba nos website www.serlimar.com.