KRALENDIJK- Corte Comun di Husticia, seccion Bonaire diahuebs 26 aprila a tuma despedidi di hues mr. Gerardus van den Dungen. Mr. Van den Dungen desde september 2016 ta trahando na Bonaire. Esaki ta e di dos termino di Gerard na Hof, e biaha aki na Bonaire.
E dispidia di mr. Van den Dungen tabata extra special, ya cu e la baha cu pension. P’esey a tene algun mini charla den e sala di corte na Fort Oranje precidi cu’n sesion special. E oradornan tabata: Sr. Duchatteau, director Speciale Les Plaatsen Scholengemeenschap Bonaire; Sr. Sealy, historiador y conocedo di Bonaire y Sr. Oleana, director di Fundacion Cas Bonaire.
Sr. mr. Van den Dungen tambe a tene un mini charla over di ‘De rechter op de uitkijkpost’. Aki e ta splica loke ser un hues na Bonaire ta nifica: ser un disimbein. Pero e tabata bale la pena, un temporada dushi riba cual e ta wak bek cu hopi alegria.
Gezaghebber Edison Rijna inesperadamente a tuma e palabra pa asina gracidi mr. Van den Dungen na nomber di e pueblo Boneriano. For di gezaghebber el a ricibi tambe un pin di Bonaire. “Awo bo tambe ta un amigo di Bonaire pa semper”.
Fiscal General, mr. Hambeukers, den su requisitor a sumergi su mes na Bonaire. Vice presidente mr. Mauritz de Kort a termina e sesion special cu e orden: bo por colga bo toga na e pal’i koko numa!
E atardi a culmina cu’n brindis den e patio di Fort Oranje.