Señora di 86 aña un biaha mas ta cay sin niun hende pa yud’e

0

Ta tristo pa mira un bes mas con na Cura Cabay 57, un señora, un mama M.E.P.E. di 86 aña, tabata grita di dolor, tur na sanger, lora bou di e cama y no por a lant’e. A yama 100 unda cu urgentemente nan a manda un ambulance. Ora cu esaki a yega nan a yuda e señora aki, lanta for di vloer, sclamando di dolor. Ela wordo transporta di biaha pa dr. Horacio Oduber Hospital.
Ta di 2 biaha den 5 dia cu e señora aki ta cay. Pregunta cu ta surgi ta e ora, unda su yiunan ta? E señora no tin mas famia? Kico Sociale Zaken ta bay haci cu e caso aki?
E caso aki tin basta tempo ta andando caba. Ta varios biaha caba e aña aki cu e señora aki ta cay, y Sociale Zaken sa di e caso aki, no di awo, pero di hopi tempo caba.
Despues cu e sali for di hospital, kico lo bay haci cu e señora aki?
Un biaha mas, lo hib’e cas y lag’e tira manera un cacho na su cas, sin un alma pa wak y ciuda di dje?
Por a compronde cu su yiunan no ta worry cu nan mama, un di nan a bula bay Bonaire sin wak atras con su mama ta y ken ta bay cuida di e mama.
Dentro di 2 siman ta bolbe celebra un Dia di Mama. E yiunan lo lubida cu nan tin mama?
Yiunan, balora boso mama awo cu e ta na bida, pasobra cu e cera su wowonan, ni cuanto lagrima bo drama, ni cu bo manda e krans di mas grandi of esun di mas bunita, ni e caha di mas caro, e lo no t’ey mas pa wak esakinan. Mama ta un so tin.
El a carga boso 9 luna den su bariga, el a wak pa boso, el a educa boso, el stima boso. Awo cu e ta grandi, dun’e su balor.
Ta spera cu instancianan concerni por haci algo urgente cu e señora aki, y mirando cu no tin ken pa cuida di dje, lo ta bon pa intern’e den un di e casnan di cuido pa nos grandinan.

Comments

comments