Arubaanse Voetbal Bond ta trahando riba e seleccion nacional di U-15, unda lo kies 18 hoben pa representa Aruba den exterior. Presidente di AVB, Ing. Richard Dijkhoff, ta sumamente contento di mira e desaroyonan di e preparacionnan cu AVB ta bin ta haciendo den e ultimo 2 aña. Nan a nombra un director tecnico, hinca un programa den otro y haci tur preparacion.
Hopi hende no a kere cu AVB lo por a inicia e proyecto aki. AVB a start cu e seleccion U-15 den categoria di mucha homber y nan ta preparando pe torneo di September. E idea cu AVB tin ta pa cuminsa prepara trempan, cuminsa cu e seleccion y poco poco yega na e 18 hungadonan cu mester. “E ta un dia special pa nos despues di tanto trabou cu nos a haci”, Richard Dijkhoff a comenta.
Despues di a nombra Martin Koopmans como director tecnico pa AVB, el a percura pa hinca un programa completamente den otro y e parti e programa ta pa recluta e hungadonan. E director tecnico hunto cu su team den e ultimo lunanan a scout e hungadonan y a yega na e cantidad di 30 hungado. Den e 30 hungadonan, poco poco nan ta cuminsa scoge ken lo keda den e seleccion y a haci e escogencia a base di nan presentacion durante e trainingnan.
“Tur cos ta basa riba un plan di training, henter un programa di preparacion pa asina nan por yega na e torneo cu nan tin”, Richard Dijkhoff a splica. E ta algo cu AVB tin basta tempo ta traha riba dje. Un di e coachnan lo ta Glenn Sambo, kende recientemente a regresa for di Hulanda cu su diploma di TC-2. El a haci e curso via AVB den cooperacion cu KNVB y Glenn Sambo a keda 4 pa 5 luna na Hulanda. Awo Aruba tin un coach mas riba e nivel halto y AVB a lag’e handle cu e seleccion U-15 cu e convencion cu e lo yuda e seleccion por haci un bon papel den exterior na September.
Director Tecnico y Bondscoach Martin Koopmans ta contento cu awo nan tin un cantidad di 24 hoben y lo keda cu 18 hungado, kendenan lo bay hunga na Florida. E seleccion tin e lunanan di Juni y Juli pa prepara bon y despues nan lo bay Florida. Prome cu por a yega na e hungadonan pe seleccion Martin Koopmans a scout e muchanan y a acerca e teamnan pa mira cua ta e edadnan cu nan por manda cu ta bou di 15 aña. Den e cantidad di hungado cu AVB a haya y entre nan AVB a scoge e hungadonan cu lo keda den e seleccion.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.