E seleccion di Aruba den taekwondo bou guia di coach Teo Rodriguez a logra un super bon resultado den e Copa Federacion di Taekwondo na Sogamosa, Colombia. Prome pa algun dia, e seleccion di taekwondo a haya e oportunidad pa entrena cu e seleccion Colombiano di taekwondo. Nan a entrena tur dia por lo menos 2 a 3 ora y dos bez pa dia. Den e campeonato di Copa Federacion unda mas cu 1000 competidor a participa nos atletanan a bataya bon y a logra un tremendo resultado final pa Aruba.
Den e asina yama TK-3, e atleta femenina y alabes campeon Suramericano Hubenil Santiago 2017, Chiara Petrocchi a logra bringa 3 pelea unda e ta logra triunfa cu dos medaya di Oro y un medaya di Plata. Mester bisa aserca cu hopi wowo tabata riba e prospecto hubenil Arubano despues di su triunfo na Chile. E hoben Charrick Winterrdaal a logra bringa 2 peleaunda e ta logra gana dos medaya di Oro pa Aruba.Tambe nos tin Hakeem Lowe cu a bringa dos pelea y aki Hakeem tambe ta triunfa cu dos medaya di Oro. E hoben Jourde Klaber tambe ta logra gana un medaya di Oro.
Nos atleta elite y Olimpico, Monica Pimentel ta hasi su reaparicion despues cu pa basta tempo e la keda afor di competencia debi na un operacion na su man a logra gana un medaya di Plata pa Aruba. Notabel ta cu Monica no a logra bringa su di dos combate mirando cu su contrincante a lesiona. Overall mester bisa cu Aruba a gana TK-3 cu 46 punto y Colombia a keda na 30 punto. Aruba sigur por ta contento cu e resultado obteni di nos seleccion na Colombia.
Lotto, e Loteria di Aruba cu pa medio di St. Sportsubsidie Aruba cu a subsidia e biahe di e seleccion di taekwondo pa Colombia kier a manda un palabra di felicitacion na nos seleccion di taekwondo cu e trmendo resultado obteni den e campeonato Copa Federacion.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.