Federacion Gimnastico Arubano ta preparando pa un otro compromiso internacional final di e luna aki na e isla Caribense di Barbados. E seleccion di gimnasia di Aruba a ricibi un invitacion pa participa na e Caribbean Gymnastics Championship, un competencia supervisa pa UPAG. Mester bisa cu e delegacion di Aruba lo consisti di 6 atleta femenino desde 11 aña y mayor mientras lo biaha 1 coach. E siguiente atletanan di gimnasia lo competi na Barbados. Nan ta Sanne van Dam, Amika Every, Jesmea Jansen, Ashley Provence, Rebecca Spellen y Kim de Vries. Tur e atletanan ta di e club CGA Avanse.
Aña pasa Federacion Gimnastico Arubano a bira oficialmente miembro di Comite Olimpico Arubano y asina e soño a inicia pa un dia por representa Aruba den weganan grandi den nos region y continente como tambe Weganan Olimpico. Den 2016, e atletanan di gimnasia a haci un tremendo papel y e resultadonan ta papia pa su mes. Den e competencianan internacional nos atletanan a luci unda na Trinidad & Tobago a logra un cantidad di 16 medaya di 4 di Oro, na Panama a logra un total di 22 medaya di cual 6 tabata di Oro y por ultimo na Puerto Rico nos atletanan di gimnasia ta conkista un total di 23 medaya di cual 9 tabata di Oro. Mirando e resultadonan obteni no tin duda cu e deporte di gimnasia ta riba e bon caminda.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atletanan di gimnasia pa e Caribbean Gymnastics Championship na Barbados.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.