MANAGUA, Nicaragua- Seis miembro di un famia a fayece den nan cas na Managua, door di un bom molotov cu presunto parapolicial. Despues, den un zona cercano, dos empleado di un alcaldia a wordo mata y kima ariba caya.
Al menos ocho persona diasabra durante un atake di hombernan arma na Managua, segun fuentenan policial, cual a hisa na 178 e cantidad di persona den e marco di e protestanan antigubernamental cu a cuminsa dos luna pasa na Nicaragua.
Seis di esunnan cu a fayece tabata miembronan di un famia kende nan cas a wordo pega na candela pa un bom molotov pa un grupo di hombernan bisti cu capuchon y arma, mientras dos otro a wordo ataca ora cu nan tabata kitando baricada di un caminda, segun polis a informa den un comunicado di prensa.
E candela di e vivienda di tres piso a tuma luga diasabra, segun famianan di e victima a bisa. Dos di nan a sobrevivi door di lansa nan mes for di un balcon: un muhe cu ta den estado grave y un mucha homber cu a drenta den hospital cu kemaduranan.
E sobrevivientenan a responsabilisa e presidente Daniel Ortega di e sucedido, den un video difundi ariba rednan social.
Segun un testigo, cerca di 20 homber arma cu fusil y bisti cu capuchon a yega diasabra den horanan di mainta na e bario Carlos Marx y a cende e cas na candela. E accionnan tabata un acto di represalia na e doño di e cas pa no a laganan uza e pisonan ariba pa pone francotiradornan y tira ariba eventual manifestantenan, el a agrega.
Bisiñanan a denuncia cu e atacantenan no a permiti di duna yudansa na e fayecidonan ya cu e atacantenan tabata tira ariba ken cu tabata yega cerca di e vivienda.
E canciyer Denis Moncada el a nenga responsabilidad y a acusa e manifestantenan cu tabata na e baricadanan.
E secretario general di e Organisacion di Estadonan Americano (OEA), Luis Almagro, riba Twitter a condena “e acto aki di teror cu ta un crimen di lesa humanidad y cu no por keda impune”.