Un di dos boletin informativo emiti diabierna merdia door di Departamento Meteorologico ta informa cu actualmente no tin ningun aviso relaciona cu tormenta tropical Harvey. Diabierna merdia e centro di Harvey tabata situa na 13.1 grado noord y 61.3 grado west. Ta premira cu Harvey lo continua ariba e rumbo aki y lo pasa 155 km noord di Aruba, diasabra atardi pa anochi. Biento duro no ta ser spera. Actualmente e grado di risico ta na 10%.
Biento lo supla di oost, noord- oost. Diasabra den curso di mainta y den oranan di atardi e tempo lo ta varia. Durante oranan di anochi, e biento lo bira pa west, zuid-west, 12 pa 18 nudo. Durante awasero e lo por subi te na 25 nudo.
Na costa zuid di nos isla por spera olanan di lama di 2 te 4 pia di haltura y na costa noord olanan di lama di 4 te cu 8 pia.
Awasero
E boletin di meteo ta indica cu ta spera entre 5 pa 15 mm di awasero, pero esaki ta mas ariba e anochi di diasabra pa diadomingo mainta. Awasero lo mengua den oranan di atardi pa anochi di diadomingo Autoridad local y ciudadanonan di Aruba mester monitoria e progreso di e sistema aki y ta ser pidi pa tuma e precaucionnan necesario pa nan siguridad personal y di nan propiedad.