Segun Minister Dowers: SPA ta haci manera e trabou di polis ta depende di un flashlight

Durante conferencia di prensa seminal di Gobierno a puntra Minister di Husticia Arthur Dowers sit a berdad cu Cuerpo Policial tin necesidad di diferente material cu ta importante pa nan por eherce nan trabou bon.Esaki relacion cu expresionnan haci dor di e lider sindical di SPA Guilfred Besaril. Segun por a compronde cu ni bullet proof vest e polisnan tin y esaki ta algo di prome necesidad mirando e rumbo cu nos pais ta mustra di ta bai aden.

Segun Minister di Husticia tur miembro di e Cuerpo Policial mester a haya nan bulletproof vest ya cu Gobierno a entrega esaki na e Korps Chef. E mandatario a bisa di ta presente na diferente ocacion cu a entrega material y esaki ta un di nan cu polis seguramente tin. Pa loke ta flashlight, segun Dowers, tin hopi caminda cu ta bende flashlights y e sa sigur cu tin placa pa cumpra esaki. Falta di un fooks no ta haci cu un Cuerpo Policial no por funciona debidamente. Mescos ta conta pa e luznan di e autonan y ta trahando pa por instala esakinan. Semper por pidi asistencia pa asina un polis por haya luz pa e sigui traha.

Loke ta bai inverti mas aden den e periodo nos dilanti ta e aspecto di formacion y desaroyo di tecnicanan pa asina e Cuerpo por funciona mihor ainda. Banda di esaki ta trahando riba mudamento di cierto departamentonan ya cu esakinan no ta adecuado pa remodelacion. E trabou di polis ta hopi mas enfoca riba inteligencia y informacion y esaki ta caminda cu mester fortifica e relacion cu comunidad tambe. Pues por mira cu e trabou di polis ta ensera mas cu e falta di un flashlight.

Minister Dowers a menciona cu el a bishita KIA recien y ta importante pa yuda hobennan criminal reintegra bek den comunidad. Cada bes ta scucha politiconan ta acusa cu tur cos cu bai robes ta culpa di un minister. Esaki e mandtario no ta di acuerdo cune paso e muchanan aki ta responsabilidad di nos tur. E mes a wak diferente hoben cu e tabata conoce di antes y awor nan ta sera den KIA. Hopi di e hobennan aki a wordo neglisha dor di famia y tambe dor di comunidad y esaki ta un di e aspectonan cu a hibanan na comete cosnan for di sla. Segun Arthur Dowers, esaki ta preguntanan cu parlamentarionan mester haci enbes di tira culpa riba tur hende menos nan mes.