Instituto Biba Saludabel y Activo, IBiSA a prepara e calendario di competencia di Deporte pa e aña escolar nobo cu a caba di cuminsa. Tur scol di Enseñansa Basico y di Enseñansa Avansa a ricibi e respectivo pakete di informacion, di tal forma cu por cuminsa prepara nan alumnonan pa e weganan deportivo entre e scolnan.
Enseñansa Basico:
Luna di September ta habri cu e prome competencia entre scolnan di Enseñansa Basico den e deporte di ‘Trefbal’. E competencia ta den categoria A y B pa mucha muher. E scolnan cu ta participa na e competencia escolar di trefbal tin te cu dia 5 di September 2016 pa inscribi nan participacion. Competencia ta cuminsa dia 19 di September 2016. E weganan lo ta parti den 4 sector pa e scolnan di Enseñansa Basico, cu ta Sector Sta. Cruz, Sector Oranjestad, Sector Noord y Sector San Nicolas.
Enseñansa Avansa:
Pa e scolnan di Enseñansa Avansa e disciplina den cual ta inicia cu weganan ta ‘Basketball’. E competencia di basketball ta pa mucha homber. Ultimo dia cu scolnan por inscribi nan participacion na e weganan ta dia 27 di September 2016. E prome weganan di basketball ta cuminsa dia 11 di oktober 2016. Pa e scolnan di Enseñansa Avansa e competencia ta parti den 2 sector, cu ta Sector Pariba di Brug y Sector Pabou di Brug.
IBiSA ta desea tur scol, docente y tur alumno un aña escolar deportivo exitoso. Alabes ta corda tur school pa inscribi na tempo nan participacion na e competencianan di ‘Deporte Escolar’ cu ta keda organisa durante e aña escolar aki. Ta importante pa docentenan encarga cu deporte na school ta consciente cu mester inscribi e participacion di su school pa cada deporte y cumpli cu e fecha stipula di inscripcion.
Deporte ta un forma di recreacion positivo cu ta yuda nos mucha y hobennan den e desaroyo y disciplina di nan estudio. Alabes ta yuda nan keda activo den movecion y hiba un estilo di bida saludabel. IBiSA cu animo ta anticipa un participacion grandi y alegre di tur scol na e competencianan escolar di e aña aki. Pa informacion adicional por tuma contacto libremente cu oficina di IBiSA su departamento di ‘School Sport en Recreatie’ durante orario di trabou na telefon 582 4987.