Ta un custumber cu tur luna Dr. Horacio E. Oduber Hospitaal ta eligi su empleado di luna. Pa e luna di November a nomina Michael Brouwer como “empleado di luna” na e instituto di cuido. Sr. Richard Fingal, Manager di e departamento di Automatisacion na Hospital a duna di conoce cu nan mesun clientenan interno ta esnan cu a nomina Michael.
“A scoge pasobra e ta integro, e ta hopi servicial, e sa hopi cos di siguridad, di camaranan y p’esey el a wordo nomina y ami ta sostene esey. Si ta un cliente ta bisa esey di mi team, wow”, asina Richard Fingal a expresa.
Banda di esaki, sra. Milka Wernet, manager di e departamento di siguridad ta e persona cu a scoge Michael Brouwer y el a bisa cu nan mester hopi ayudo di e departamento di IT y Michael como experto ta esun cu nan ta puntra pa yuda pa drecha e camaranan, ora mester di camaranan extra of proyectonan pa e camaranan nobo pa Hospital.
“Mas tanto Michael ta esun cu ta yudando nos cu esaki. Semper el a mustra su profesionalismo pasobra el a sigui studia e camaranan aki asina bon. E ta duna nos conseho riba kico ta bon. E sa kico ta esun corecto pa Hospital”, el a señala.
Segun Milka Wernet, e ta encarga di e camaranan pero Michael ta e experto y conoce e camaranan por completo. “Nos ta hopi contento cu su servicio pasobra ora cu nos tin problema e ta yuda nos. No cu camara so sino cu otro problemanan di IT tambe. P’esey di hopi tempo mi a purba pa mira con nos por nomina Michael como empleado di luna tambe”, el a duna di conoce.
Un pabien grandi ta bay na Michael Brouwer cu a demostra di merece e nominacion aki y cu ta un ehempel pa otro coleganan den Hospital.