Diadomingo durante dia e federacion di esgrima SABA a tene nan respectivo torneo pa tur nan atletanan. E competencia tabata den e 3 categoria esta infantil, cadets y senioren. E combate nan tur tabata di bon nivel unda e atletanan a resalta cu nan strategia, atake y liherez usa durante cada combate. E ganadornan di e campeonato enconexion cu e ASU Olimpiada 2017 ta como lo siguiente; Infantil 1. Nikiana Thompson, 2. Desmond Tromp, 3. Myron Balentin. Den e Cadets 1. Alex Wever, 2. Shawndrella Blanco, 3. Nykiana Thompson. Por ultimo den Senioren 1. C-yen Thompson, 2. Alex Wever y 3. Nykiana Thompson. Na final sr. Willy Williams di IBISA San Nicolas a hasi entrega di e medayanan na e ganadornan.
Mester bisa cu recientemente e federacion di esgrima a organisa un competencia internacional Dutch Caribbean Fencing Championship 2017 cu a resulta den un exito rotundo. E resultadonan di nos atletanan tabata papia pa nan mes cu Nikaina Thompson logrando un prome lugar den e categoria 11 anja den e disciplinanan di Sabre, Foil y Epee. Den e ASU Olimpiada tambe Nikaina a logra un prome lugar. Notable ta cu na band di e competencianan e federacion ta trece expertonan di exterior pa engradese nan deporte unda ta duna tayer na nos hendenan local, esaki pa coach, dirigente y e propio atletanan mes.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di ASU Olimpiada 2017 den esgrima.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.