Saxofonistanan di Vento do Norte no a desapunta ningun hende

0

Siman pasa na Cas di Cultura mi a presencia un di e conciertonan mas conmovedor den mi bida, e concierto cu Kunstkring a presenta di e conhunto musical Vento do Norte. Mi a scucha e concierto di e grupo di Henk van Willert algun aña pasa den e ballroom di Marriott tempo e tabata consisti di 8 saxofonista y mi a keda hopi emociona dia cu mi a tende cu nan tabata bay toca atrobe na Aruba.

Aunke e aña aki Vento do Norte tabata consisti di solamente 4 saxofonista plus e director, mi expectativa tabata halto, ya cu nan programa Alma Azul tabata mustra un mescla grandi di diferente tipo di musica: Adagio, fado, tango, jazz y varios obra di compositornan di Aruba y Corsou. Nan no a desapunta mi.

E cuater saxofonistanan cu director Van Willert a scoge pa e gira e aña aki ta studiantenan avansa na e scol di musica y arte na Oporto caminda e ta profesor. Tur cuater ta Portugues y nan a demostra di tin un futuro briyante cu nan tocamento. Esun cu a hala mas atencion sigur tabata Adriana Oliveira. No solamente pasobra e tabata e unico mucha muher. Adriana ta e mas chikito di tur, pero ta toca e instrumento mas grandi, e saxofon bariton. José Pedro Gonçalinho y Pedro Pereira tabata cambia nan instrumento de bes en cuando y a toca soprano of alt. Hristo Goleminov a mustra su dominio riba su saxofon tenor. Henk van Willert mes tabata compaña su studiantenan tocando bariton of alt. Berdaderamente, Kunstkring a presenta un concierto di musiconan di calidad zuiver.

Cuminsando cu tres cantica hopi conoci y popular di West Side Story, Vento di Norte a mustra e audiencia nan versatilidad tocando musica di diferente genero y ritmo, manera musica di Astor Piazzola, Air di J. S. Bach, Adagio di Samuel Barber, fado di Amalia Rodriguez, El diablo suelto di e Venezolano Heraclio Fernandez. Remarcablemente, e musiconan a toca henter anochi di memoria!

Un sorpresa grandi y placentero tabata despues di pauze ora cu e maestro van Willert a presenta Stephen Diaz, un hoben Arubiano percusionista cu e grupo a topa ta practica den Cas di Cultura y a impresiona nan. Nan a regla pa Stephen parece den e programa y Stephen a impacta nos tur cu su tocamento y su carisma. Definitivamente Stephen lo ta un otro Carlos Bislip.

E momentonan conmovedor tabata ora cu Henk van Willert a duna homenahe na e compositornan Arubiano y e musica cu nan a produci. Cu palabranan di cariño, maestro Willert a pidi un aplauso di reconocimento pa Livio Hermans pa su precioso Pavane. Sin menciona e titulo Abo So, el a invita esnan presente pa canta of baila lo ke el a yama “casi himno nacional” . Ningun hende a baila, pero e publico a mustra nan amor pa e obra di Padu cantando di curason. Van Willert yen di emocion a lamenta cu Padu no por tabata presente y el a gradici yiu di Padú kende si tabata den Cas di Cultura. Den su emocion, ekibocadamente van Willert a intoduci Atardi como un composicion di Padu, pero esnan presente no a tume na malo; nan a canta cu hopi sentimento e obra nostalgica asina stima di Rudi Plaate. Cu e notanan precioso di What a wonderful world di “Satchmo” Armstrong, Vento do Norte a cera un anochi musical inolvidabel.

Danki, Kunstkring. Mi ta spera cu pa boso proximo concierto nos pueblo lo mustra mas aprecio pa e trabou cu boso ta haci di trece musica y musiconan di calidad na Aruba.
Skirbi pa Clyde Harms