BOGOTA, Colombia – Presidente Juan Manuel Santos a confirma cu mañan e lo reuni, separadamente cu e expresidentenan Alvaro Uribe y Andres Pastrana pa aborda e tema di e renegociacion di e acuerdonan di Havana cu guerilla di FARC.
E prome encuentro lo ta pa 10’or y mey di mainta cu Andres Pastrana, kende a confirma via di su cuenta di Twitter cu e lo bay bebe koffie cu Santos.
Un ora despues, pa 11’or y mey di mainta, e mandatario di e Colombianonan lo bay tin un encuentro cu senador Alvaro Uribe Velez.
E confirmacion di e encuentro entre Santos y Uribe lo tuma luga despues cu e mesun expresidente y actual senador, lo yama Presidencia pa pidi un cita cu e hefe di Estado pa trata e tema di e acuerdonan.
Tras confirma e encuentro, presidente Juan Manuel Santos a informa via di su cuenta di Twitter cu el a invita pa dialoga e expresidentenan “cu animo constructivo y pro paz.”
Previamente Uribe a sigura cu e tabata dispuesto pa reuni cu e presidente Juan Manuel Santos pa papia riba e acuerdo firma.
Den un entrevista cu Claudia Gurisatti, directora di Noticias RCN, e exmandatario a sigura cu den dicho reunion e lo puntra e Hefe di Estaso di por haci of no modificacion den e acuerdonan.
“Si ta toca na ami pidi un cita na e presidente di e Republica, pa bis’e cu nos ta preocupa cu e acuerdonan, pues mi lo pidi e cita eynan. Mi lo bay eynan, pero mi no por bay eynan mi so, pero si nos lo bay expresa nos preocupacionnan,” el a manifesta.
Y el a bisa: “Por lo pronto mi kier puntr’e respuestuosamente (na e presidente) durante e cita aki loke abo a sugeri y loke mi a otorga na bo mi autorisacion, pa formalisa e pedido eynan, sin cambia e acuerdonan.”
“Mi ta bay eynan si nan dunami un audiencia y mi lo puntra si e coregi e acuerdonan y ademas nos lo papia di tur cos. E Hefe di Estado pa Constitucion y ley ta pa e conduci e negociacionnan,” el a añadi.
Den Congreso, algun sector a pidi pa ehecuta e encuentro aki lo mas pronto posibel pa concilia e posturanan riba e acuerdo di paz.
Fuente: RNC Noticias