BOGOTA, Colombia- E president Colombiano, Juan Manuel Santos, diasabra a pidi su homologo Mericano, Donald Trump, pa solicita e mandatario Ruso, Vladimir Putin, pa stop di apoya e “regimen” di Nicolas Maduro.
“Pa contribui na e solucion di e crisis na Venezuela, mi ta pidi presidente Trump pa solicita Putin pa stop di apoya e regimen di Maduro”, asina el a scirbi riba su cuenta di Twitter.
Dia 21 di mey ultimo Putin a felicita su colega di Venezuela pa su reeleccion den e eleccionnan presidencial y a expresa su disposicion pa sigui impulsa e cooperacion entre e dos paisnan.
Putin a “mustra convenci di cu actividad di presidente Maduro na cabes di estado lo permiti pa garantisa e desaroyo di e relacionnan di asociación strategico cu ta existi entre e dos paisnan.
Den Rusia, Venezuela a haya un aliado strategico di su politica multilateral como tambe un proveedor di arma, tecnologia y otro recursonan.
E relacionann di Venezuela cu Rusia durante e presidencia di Hugo Chavez (1999-2013) a biba un relansamento den varios area manera e area energetico, e militar y e cooperacion cu Maduro a mantene durante su mandato.
Desde 2013 Venezuela ta sumi den un crisis economico, politico y social profundo cu a pone cu miles di Venezolano a busca refugia den otro paisnan manera Colombia.
Dia 13 di juni, e gerente di Frontera cu Venezuela, Felipe Muñoz, a sigura cu mas di un miyon di persona a emigra di Venezuela pa Colombia den e ultimo 15 lunanan, di cual 819.000 ta di vocacion di permanencia.