Salud: Zika tambe ta causa lesionnan cerebral den macaco

1

LONDON, Inglatera – Cientificonan Mericano a detecta pa prome biaha lesionnan celebral provoca pa e virus Zika durante e desaroyo fetal den primatenan no humano, segun un estudio publica den e revista Nature Medicine.
E observacion experimental di un caso di malformacion den un ehemplar di macaco rabo di porco (Macaco nemestrina) por facilita e creacion di un modelo animal pa proba e eficacia di intervencionnan terapeutico viabel den humano, EFE a informa.
“E estudio aki lo yuda nos na determina si un vacuna of tratamento contra zika ta preveni e lesionnan celebral den e feto, mescos cu pa conclui si ta sigur administra e remedinan ey durante embaraso,” Kristina Adams, investigado di e Universidad di Washington (Merca), kende a lidera e trabao, a afirma.
E resultadonan di e grupo Mericano “ta anula cualkier duda cu por keda riba e increiblemente peligroso cu ta zika pa e desaroyo di e feto,” Adams a añadi, profesora di obstetricia y ginecologia, den un comunicado di su universidad.
E investigacion, caminda cu a inocula e virus na primatenan na estado, ta aporta e prome pruebanan directo cu zika por atravesa e placenta den fasenan mas laat di e embaraso y afecta e feto.
“Nos a keda hopi sorprendi ora cu nos a wak e prome imagen di resonancia magnetico di e celebro fetal dies dia despues di a inyecta e virus. Nos no a premira cu un area asina amplio ta keda asina profundamente afecta den asina poco tempo,” Lakshmi Rajagopal, coautor di e estudio a sostene.
A rais di e resultadonan ey, e cientificonan ta kere cu cualkier tratamento pa preveni malformacionnan celebral den e feto, tin cu consisti den un vacuna of bon den un remedi profilactico administra na e momento di e infeccion pa un picadura di e sangura, den bista na neutralisa e virus lo mas pronto posibel.
“Ora cu un muhe na estado cuminsa nota e prome sintomanan, e celebro di e feto ya por ta daña,” Rajagopal a adverti.
E luna aki, e Organisacion Mundial di Salud (OMS), a considera cu e epidemia di e virus Zika por constitui un emergencia sanitario di alcance internacional, dado na su continuo expansion geografico y e amplia lagunanan den conocimento riba e efectonan neurologico.
E epidemia ta procede di un cepa identifica pa prome biaha riba e islanan di Pacifico, na 2007, si bon a cobra forsa na final di 2014, ora cu el a cuminsa propaga na Brasil.
Na Juni, OMS a presenta un plan di respuesta na e crisis sanitario centra riba prevencion, pa cual a calcula cu ta necesario 121 miyon di dollar (107 miyon di Euro) te cu fin di 2017.
Fuente: El Universal

1 COMENTARIO

  1. Podise ta esey a pasa cu e macaconan atracadornan na Aruba, cu nan cerebro a worde afecta, kiko mas hende por pensa?

Comments are closed.