Un hoben kende su mama casi ta muri di cancer, a diseña un brazier cu ta yuda detecta e malesa desde su comienso.
Julian Rios Cantu, un studiante di Mexico, di 18 aña a gana e premio grandi na e Global Student Entrepreneur Awards pa su invento, potencialmente diseña pa salba bida, cu el a duna e nomber di “Eva”.
“Tempo mi tabata tin 13 aña, mi mama a wordo diagnostica pa di dos biaha cu cancer di pecho”, Rios Cantu a bisa.
“E tumor for di un size di un grano di aroz a crece size di un bala di golf den seis luna. E diagnostico a bin demasiado laat y mi mama a perde ambos pecho y casi su bida”.
E brazier diseña pa Rios Cantu y tres di su amigonan tempo cu e tabata tin 17 aña, ta uza sensornan pa midi e superficie di e pecho y ta midi e textura, color y temperatura.
Inspira door di e experiencia di su mama, e invento a wordo crea pa muhenan cu tin predisposicion genetico di cancer di pecho. E material ta registra como derecho di propiedad intelectual.
E hende muhe no mester depende di auto exploracion so cu ta consisti di uza bo dedenan di bo man, pas’e riba e pecho y haci un diagnostico completamente subjetivo, cu hopi biaha por ta fatal. El a splica cu e brazier ta reduci e tempo cu ta pasa entre cada revision.
Uzando un aplicacion, usuarionan di e brazier por controla nan condicion.
Actualmente, Rios Cantu, kende actualmente ta CEO di su mesun compania Higia Technologies, a bisa e corant Mexicano EL Universal: “Ora cu tin un tumor na pecho, tin mas sanger, mas calor, dus tin mas cambionan den temperatura y textura.
“Si nos ta ripara un cambio persistente, nos ta recomenda pa bo bay un dokter”.
“Dicon un brazier? Pasobra e ta duna nos e oportunidad pa mantene e pechonan den e mesun posicion y e no mester wordo uza mas di un hora pa siman”, el a agrega.
Como cu e invencion di e hoben ta unicamente un prototipo, e ta predeci cu e lo dura dos aña prome cu e ta certifica pa wordo uza.
Nan obhetivo ta pa cuminsa cu muhenan cu BRCA1 y BRCA2 (ta e inicialnan pa referi na e predispocion di cancer di pecho).
E hobennan cu a desaroya e brazier a splica cu su uzo lo resolve algun di e problemanan ya cu ademas e diagnosticonan lo wordo realisa door di un software cu no ta comprometi na subhetividad humano.
Ainda na nivel mundial no tin un cifra exacto di cuanto persona ta sufri di cancer di pecho.
Fuente: http://www.eluniversal.com.mx