PHILIPSBURG- Ministerio di Defensa Hulandes y Ministerio di Interior di Francia, a manda extra personal pa restaura ordo na St. Maarten, despues di e destruccion causa door di horcan Irma.
Diaranson anochi tabata tin varios sakeo despues cu e horcan di categoria 5 a aleha for di e isla, comparti entre Francia y Hulanda.
Minister Frances di Interior, Gérard Collomb, a confirma cu tabata tin varios sakeo cu a tuma luga despues cu e Irma a aleha. Pero polisnan ta purbando pa mantene e ordo ariba isla.
Riba e banda Hulandes, St. Maarten tambe tabata tin sakeonan. Esaki a wordo confirma door di luitenant-ter-zee Egbert Stoel riba NPO Radio 1. Pero e no por a bisa nada tocante morto of heridonan ariba e isla.
Mayoria di e daño ta ariba e parti Hulandes, aunke e otro islanan Saba y St. Eustatius tambe a ricibi dañonan considerabel cu e paso di horcan Irma.
“Reino Hulandes a wordo grandemente afecta y e daño material ta grandi. Tin gran necesidad pa awa y cuminda. Lamentablemente, ainda e isla no ta accesibel door di e destruccion causa na e airport y e waf di e isla”, segun Prome Minister Hulandes, Mark Rutte.
Diahuebs soldatnan na St. Maarten, Saba y St. Eustatius a cuminsa cu e reparacionnan. Marinonan y personal di e armada Hulandes lo traha ariba e infrastructura y tambe lo mantene e orden publico, segun e ministerio di Defensa.
Secretario general di Nacionnan Uni, Antonio Guterres a elabora ariba e victimanan y e daño inmenso cu e horcan aki a causa. Den un comunicado el a expresa su simpatia pa cu e habitantenan y e gobierno di e paisnan afecta y nan respectivo areanan. El a felicita autoridadnan, cu tabata bon prepara y tabata responde hopi bon.
Irma ta e horcan mas poderoso cu a yega di keda registra den e region.
https://www.facebook.com/emilie.greaux/videos/1616139541764501/
Fuente: https://hoholok.com