MOSCU, Rusia – Moscu ta realisando un gran demostracion di forsa na Krim (Crimea), poco mas di dos aña cu Rusia a anexa e teritorio aki.
E ta realisando ehercisionan militar riba tera, lama y aire, den maniobranan yama Kavkaz 2016, a lo largo di henter e distrito militar di Rusia na e frontera cu Ucrania.
Fred Pleitgen, coresponsal di CNN, ta bisa desde e base militar Opuk na Krim cu e obhetivo ta cla.
“Rusia ta mandando un mensahe hopi cla cu e ehercisionan aki na gran escala y hopi compleho. Su forsanan ta ancra na krim, cla pa bringa den cualkier momento,” el a bisa.
“Loke nan ta haci den e ehercisio militarnan aki ta simula un invasion di Krim y nan ta simula cu su forsanan ta combati e invasion.”
E ta bisa cu e forsanan Ruso ta mas miho cu nunca ekipa y ta mas moderno.
E ehercisionan ta envolvi mas di 12 mil solda, decenas di avion realisando simulacionnan di combate, avionnan di atake bombardeando riba tera y lama, mescos cu e forsanan terestre realisando un atake amfibio.
Pero e vocero di ministerio di Defensa a insisti cu e ehercisionan aki no ta un provocacion.
“E maniobranan aki a wordo planea cu hopi anticipacion,” el a bisa. “Nos no kier provoca ningun hende. Solamente nos ta purbando e preparacion di nos forsanan pa repela cualkier atake di cualkier pais.”
E ehercisionan militar ta sosode durante un momento di hopi tension cu Merca y NATO debi na e anexo di Krim y otro asuntonan.
Fred Pleitgen a bisa cu e ehercisionan militar hopi probabel lo causa un descontento na Ucrania y entre e paisnan mas oriental di e bloke di NATO.
E hefe di Estado Mayor di Rusia, Vlery Gerasimov, a bisa cu den un evaluacion inicial ta indica cu e ehercisionan a sosode sin contratiempo. “Nos mester bay y analisa tur cos pero parce cu e unidadnan a traha den conhunto hopi bon,” el a bisa.
Fuente: CNN en Español