DEN HAAG, Hulanda – Rusia ta menasa di cera su espacio aereo pa avionnan di Hulanda. Esaki segun De Telegraaf a publica diamars. Motibo di esaki ta slotnan di e compania di carga aereo Ruso, AirBridgeCargo (ABC) na Schiphol, pa cual e mester haci uzo di un otro airport.
Door cu a yega e capacidad maximo acorda cu Schiphol, e sector di trafico aereo a haya recientemente un 20% menos di mashinnan di placa na Schiphol. Esaki ta nifica un reduccion substancial riba e cuenta di, entre otro, ABC, cu hustamente tabata kier a expande na Hulanda. Algun di e vuelonan a wordo move pa Luik, Belgica.
Ceramento di e espacio aereo pa vuelonan for di Hulanda, lo nifica, particularmente pa KLM, un golpi duro pa motibo cu hopi vuelo pa Lehano Oriente ta pasa ariba e pais inmenso aki. E vuelonan pa China, Corea del Sur y Hapon lo tuma mas hora si kier evita di pasa ariba Rusia. Pa pasahero, esey lo costa e compania cientos di euro. Vuelonan pa Moscu y St. Petersburg lo wordo cancela completamente.
Segun De Telegraaf tin reunionnan riba nivel halto tumando luga riba e cuestion. E ministerio di Infrastructura y Waterstaat no kier a “ni nenga, ni confirma” e conflicto. E Rusonan lo a duna Hulanda te diasabra pa resolve e problema.
Fuente: https://www.luchtvaartnieuws.nl/