Japon a gana Colombia 1-2 den nan prome wega di Mundial di Rusia 2018, cual a wordo hunga den e Mordovia Stadium na Saransk. E selección Colombinao a keda cu’n hungado menos poco rato despues di cu e wega a cuminsa. A pesar di cu nan a purba di empata e score, e inferioridad numerico a wordo sinti na final di e partido.
Na di 3 minuut di wega, Carlos Sanchez ta wordo sanciona pa un handsball den e area penal y ta wordo expulsa for di e partido. Esaki sigur a hunga un rol den henter e partido.
Japon ta haya un penalty, cu ta wordo cobra pa Kagawa, asina tambe Japon ta bay ariba.
Colombia ta purba bin bek, pero cu un hungado menos esaki ta bira dificil.
Na di 12 minuut, Radames Falcao ta tira ariba e gol defende pa Kawashima.
Na di 16 minuut, Kawagama un poco mas ta score e di dos gol pa Japon, pero e ta bay na banda.
Na di 30 minuut, Falcao un biaha mas ta desperdicia un oportunidad, pero e tabata mucho leu, den un imagen similar di su prome oportunidad. E hungado Colombia ta busca tur manera pa drenta mei mei di e dos hungado Japones, na cada chens cu e haya.
Na di 38 minuut, Colombia ta empata e partido cu’n gol di Juan Quintero…
Despues di a domina e bala pa mayoria di tempo, Japon no tabata tin mucho oportunidad pa amplia e score. Cu e entrada di e medio campista James Rodriquez na di 58 minuut di wega, Japon a bay den defensa. Pero e falta di un homber mas, a pisa hopi ariba e ekipo Cafetero.
Na di 73 minuut di wega, Japon ta bay ariba cu’n gol di Osako.
Colombia a haci tur lo posibel, pero fisicamente nan no tabata por mas. Ta di warda kico Colombia lo bin cun’e den e siguiente partido.
Asina tambe e Nipponnan a tuma revancha pa e goleada cu Colombia a dunanan cuater aña pasa, den e mundial di Brazil 2014.