Sr. Rudy Lampe, na tres ocasion tabata e prome riba e lista di ReD, e biaha aki riba 22 di September 2017 e lo ta e ultimo riba e lista, si haya aprobacion di e reunion di miembrecia cu lo tuma luga dia 2 di Juli proximo. Sr. Lampe ta pidi pueblo huzga mi pa mi obranan. Si un hende tin prueba cu mi a enriquese mi mes inhustamente riba custia di pueblo, lo mi retira de inmediato di politica. Si un hende por demostra cu mi ta hiba un bida di luho sin cu por hustifica di mi entrada, mi ta retira de inmediato di politica. Si un hende por demostra cu mi tin negoshinan, manera television, radio, uitzendbureau, you name it, of un bida di luho den un suit di 2 miyon, of cas na Malmok, sin cu mi entrada ta hustifica un bida di luho asina, mi ta retira de inmediato di politica. Sr. Lampe ta sigui bisa cu e ta hiba un bida honesto y humilde, pa 25 aña mi a traha como sacerdote sin cu mi a cobra salario pa mi trabao sacerdotal. Pesey, e ta pidi pueblo huzg’e pa su obranan, pasobra Aruba mester di lidernan cu no ta stima placa.
E lema di su campaña ta: “Voz di pueblo den parlamento”. Segun Sr. Lampe, si e haya e confianza lo e tin consulta permanente cu pueblo pa tur votacion cu mester keda haci den parlamento. E por garantiza e votador cu no ta esunnan cu ta hinca placa bruto lo dicidi den parlamento, pasobra e partido blanco no ta permiti esey, sino e votador lo haya voz den tur decision cu cay den parlamento. Sr. Lampe lo duna e poder bek na e pueblo den parlamento.
E votador sa cu hopi di Sr. Lampe su ideanan tabata kisas demasiado dilanti di tempo. Por ehempel ta awor ta discuti e tema cu esun cu haya mas voto lo mester drenta parlamento independiente di e secuencia di e lista. Sr. Lampe por cita di e gentlemen’s agreement cu tur candidato di ReD mester a firma ya na juni 2005: “Pa medio di esaki mi candidato riba lista di Partido Red Democratico pa eleccion na september 2005 ta declara y ta priminti cu mi ta bon na altura cu segun nos leynan pa eleccion pa parlamento di Aruba (Kiesverordening, AB, 1987, 110) e secuencia di lista ta determinante pa dicidi kende ta drenta parlamento si acaso un partido haya suficiente voto pa un of mas asiento. Sin embargo RED a ser lanta pa bini cu cambionan fundamental pa asina a lo largo Aruba haya bon gobernacion, intengridad den gobernacion y un democracia bibo. Den un democracia bibo ta esun cu pueblo a duna confianza directamente/personalmente pa medio di su voto, mester tuma asiento den parlamento … Pa RED e secuencia riba lista no ta di importancia. Cual sea e posicion riba lista, ta e candidato(nan) cu logra mas voto (cu un diferencia substancial di voto) lo cubri asiento den parlamento. Sr. Lampe ta priminti for di awo cu despues di eleccion ta conoci, lo e respeta e declaracion firma aki, aunke cu pa ley e por tin derecho riba e asiento, aunke si el a haya por ehempel un (1) voto so.”
Esaki ReD a introduci na Juni 2005, despues di esey tabata tin tanto aña di gobernacion di MEP y di AVP y ningun por a regla e cambio aki cu nos a propone na 2005. Y awe na 2017 ta bolbe bay eleccion sin cu e cambio aki a tuma lugar. E ta hopi tristo cu voz di pueblo no ta wordo respeta, pesey si bo kier un cambio di berdad unda ta duna pueblo bek su valor y dignidad, segun Sr. Lampe su humilde opinion, no tin otro alternativa cu vota pa ReD,e partido blanco. Tambe ta priminti e candidato na 2005 caba cu e ta candidato pa parlamentario, no pa minister. Y te awe Sr. Rudy Lampe ta kere cu Aruba mester di un zakenkabinet, awe mas cu nunca.