Esnan cu ta importa klapchi, mescos cu e bendedonan, tin cu sigui e reglanan di DOW pa loke ta transporte y finalmente control di e klapchinan. Manera aña pasa si por corda ainda, tabata tin cierto puntonan di benta riba nos isla cu a wordo cera pasobra nan no a cumpli cu e reglanan di distancia, cual segun Rubin Ponson, experto den explosivo di DOW, e bendedonan ta na altura di dje.
Aña pasa tabata tin algun di e containernan cu mester a wordo hala. Por lo menos esakinan no lo bay riba e mesun camindanan bek. E otronan semper lo wordo controla tambe pa nan cumpli cu tur e reglanan ey.
Tur e reglanan a keda mesun cos, segun Rubin Ponson. A sinta cu e importador y tambe e bendedornan di klapchi. Practicamente no tin regla cu a cambia, pero manera semper ta bisanan durante e reunionnan aki kico ta loke ta desea segun e reglanan cu tin. Semper tur instruccion lo ta na Ingles, Papiemento, Spaño y Hulandes. Y nan tin cu wordo poni riba tur pakete cu ta bin.
Ponson a remarca cu e controlnan lo sigui mesun cos cu tur aña. Ta controla tur e luganan di benta y na momento cu constata algo cu ta iregular of cu no ta cumpli cu e reglanan cu tin, lo depende di kico el a haci, pa por cera e luga, hunto cu polis y depende na kico e ta, ta wak si tin algo pa drecha, lo e tin cu drech’e prome cu e habri e luga bek, of den caso cu tin klapchi ilegal cubo, e por wordo cera y e vergunning no ta hay’e mas tampoco. Ta depende di e infraccion.
Klapchinan lo bay cuminsa wordo bendi riba dia 27 di December te cu dia 31 di December den oranan di atardi.