E torneo di golf mas popular riba e isla a tuma luga na e cancha di golf ganado di premio, diseña pa Robert Trent Jones II, diasabra ultimo, y a conclui cu Ruben Goedhoop y Gregory Croeze como e ganadonan, cu e duo di tata y yiu Mike y Maurice DeIisle na di dos luga, y Nigel Nedd y Luis Camara, na di tres luga.
E torneo anual, organisa riba e isla pa e di diesdos aña consecutivo, ta un evento di recauda fondo pa sostene instancianan caritativo local. E ta wordo ofreci pa Arion Wine Company NV conhuntamente cu Wente Vineyards di California y Papiamento Restaurant. E torneo a registra un total di 124 participante, pa un formato dibertido di scramble di dos persona.
E fondonan colecta a wordo dedica na Fundacion Guia Mi, un fundacion cu ta ofrece proteccion na menornan di edad kendenan a sufri di negligencia, abuso fisico of abuso sexual. Fundacion Guia Mi su trahadornan social ta wordo apunta pa un hues pa sirbi como un voogd familiar; guiando e hoben of mucha, nan famia y otronan envolvi, cu e meta di resolve problemanan familiar pa asina e mucha por sigui biba cu su famia di origen.
E shotgun start di 12:30 di merdia tabata personalmente supervisa pa Golf Pro James Kiley y Director di Golf Oliver Riding, sosteni pa Govert van der Hout di Arion Wine Company NV y Eric Wente, Director di e Hunta di Directiva di Wente Vineyard, kende a gradici tur e hungadonan pa nan participacion.
Despues di a disfruta di un atardi excelente riba e cancha di golf, e participantenan a bin hunto rond di e piscina na e clubhouse durante e bahada di solo, disfrutando di algun sopi y sandwich delicioso cu a wordo prepara pa e restaurant na Tierra del Sol, combina cu biñanan di Wente Vineyard, sigui pa un ceremonia di premiacion, presentacion di premio y oportunidadnan di saca portret, cual a conclui e dia yen di accion.
Tur premio tabata cortesia di Wente Vineyards y a inclui algun di e biñero su miho biñanan, den botternan masha grandi, como tambe un biahe pa bishita e biñero na California pa e ganadonan di e prome luga, kendenan lo hunga golf riba e cancha di golf diseña pa Greg Norman, come den e famoso restaurant, y naturalmente disfruta di un tour di e facilidadnan di produccion.
E ceremonia di premiacion tambe a reconoce esnan cu a cay mas serca di e pin, incluyendo Ron Moser riba #3, Glan Pieters riba #7, Randy Arends riba #13, Jo-Anne Arends riba #15, y #17, y Shirley Barrow cu e drive di mas largo riba #16. Un extra premio a wordo premia na e participante cu a gana e quiz di biña, demostrando su conocemento di e marca di Wente; el a wordo premia cu un botter di 3 liter di Wente Riva Ranch Chardonnay.
Tur hungado a expresa nan satisfaccion completo cu e organisacion detaya di e torneo, y e tantisimo tokenan special; hopi palabra di compliment a bay na Papiamento Restaurant pa e sandwichnan creativo y inspira cu a wordo sirbi durante e dia pa e participantenan por come mientras cu nan tabata hungando golf.
“Nos ta organisando e torneo atrobe, otro aña,” van der Hout a bisa, ”Eric Wente ya caba a anuncia cu e lo ta bek pa e di 13 torneo consecutivo,” cual a envolve planeamento detaya for di e ekipo di Arion Wine Company.
Aki por mira Eric Wente, Govert van der Hout, James Kiley y Oliver Riding na e ceremonia di premiacion, hunto cu e ganadonan feliz.
E Torneo di Golf anual di Arion Wine Company, Wente Vineyards & Papiamento Restaurant Golf Tournament a wordo sosteni pa e siguiente companianan: Aruba Airport Authority, Aruba Bank, AIB Bank, Albo Aruba, ASD, Bright Bakery, Complete Logistics, Guardian Group Fatum, Nagico, Oduber & Kan, Plus Accountants, Setar NV, Garage Cordia, Robertson Fire Protection, Aruba Aloe, AWA, Aruba Happy Rentals, Pro-Tec, Tundruk, y Tri-Bike.