Sr. Ralph Maduro di Power FM, a duna e ultimo desaroyonan encuanto e estado salud di Sr. Ruben Garcia, director di e radiostation.
Manera nos tur por corda, Sr. Ruben Garcia a sufri un problema cu su salud, pa cual el a wordo manda cu urgencia pa Colombia. Segun Sr. Maduro, tur e testnan haci ariba Sr. Garcia a sali satisfactoriamente. Segun Sr. Maduro, e tin contacto diariamente cu famia di Sr. Garcia. Pa loke ta e operacion di Sr.Garcia, esaki a bay bon, y e recuperacion lo tuma algun siman y Sr. Garcia lo tuma un paar di siman extra, un sorto di vakantie pa asina e por recupera satisfactoriamente. E situacion di Sr. Garcia ta uno cu a tuma hopi hende di sorpresa y cu a spanta hopi hende.
Sr. Maduro a sigui bisa cu a dicidi di bin dilanti, pa motibo cu tin hopi rumornan falso y tambe ariba rednan social, caminda cu nan a duna informacion cu Sr. Ruben Garcia lo a fayece. Pero Sr. Garcia ta recuperando, no tin niun peliger pa su salud actualmente. Y e lo mester bay poco poco pa asina logra recupera totalmente.
Cu e ausencia di Sr. Garcia, gerencia di Power FM lo bay traha ariba cambionan den programacion di e radiostation, pa motibo cu Sr. Garcia lo bay ta ausente pa un temporada poco largo, pa mas o menos dos pa tres luna, unda cu e lo ta bay ta completamente ausente, segun Sr. Maduro.
Tabata e intencion di Sr. Garcia pa despues di Carnaval a bay un vakantie chikito, y hustamente awe dialuna, 19 Februari, tabata e dia cu e lo mester tabata bek na trabao. Pronto Sr. Maduro lo ta biahando pa Bucaramanga, pa asina bishita Sr. Garcia y pone su mes, personalmente na altura di e estado di salud di Sr. Garcia.
Masnoticia ta desea Sr. Ruben “Scorpio” Garcia un pronto recuperacion y cu pronto e ta bek na su isla natal, full recupera.