Campeonato HEINEKEN fast pitch di Aruba Softball Bond a continua riba veld di Kudawecha. Diahuebs anochi e ekipo di Royal Power tabata tin dos compromiso contra e fuerte ekipo di Spuiters MIPA. Den e prome dos inningnan e muchanan di Royal Power a baha pisa riba nan x colega atleta esta Angelo “Dang” Arnold kende a inicia riba monticulo pa Spuiters Mipa poniendo bataso tras di bataso den tur skina di Kudawecha pa acumula 6 careda riba 8 hit. Den tercer entrada Manager di Spuiters Henk Arnold ta trese Gilward Wester como relevo pa paga candela pero e ta drenta manera cu gasolin el a tira den wega y Royal Power ta mantene su ritmo pa asina knock out Spuiters finalmente. Royal Power 13 careda, 15 hit, 0 careda. Spuiters MIPA 1 careda, 3 hit, 3 eror. Jomark Flanegin ta mustra solido riba monticulo pa registra un victoria mas riba su nomber mientras Angelo Arnold ta bay cas cu e derota. Mihor bateadornan pa Royal Power ta Jair Thompson 1-1 cual tabata un cuadrangular, Kelvin Silvania y Jomark Flanegin ambos di 4-3, Gregorie “Pilin” Krosendijk 3-2, Franco Wouters di 2-2. Pa Spuiters a luci na plato Angelo Arnold y Richard Krozendijk di 2-1 y Deyon Peterson di 3-1. Den e segundo wega Henk Arnold mes a tuma monticulo over y a bay henter e ruta pero a keda cortico. Jair Thompson di otro banda kende poko poko ta mustrando mas skerpi trahando duro pa por domina su control ta gana e partido. Royal Power 7 careda, 11 hit, 2 eror. Spuiters 7 careda, 3 hit, 1 eror. Wega tabata 5-4 pa Royal Power te den di 5 inning prome cu Royal Power a score 2 careda pa segura e wega. Miho bateadornan pa Royal Power ta Gregory “Pilin” Krosendijk , Joshua Ramada y Jomark Flanegin tur di 3-2. Jomark Flanegin den ultimo 4 weganan den e siman aki ta batiando di 12-10 incluyendo 2 cuadrangular y pues ta “red hot” compitiendo fuerte pa e titulo maximo como championbatter 2016. Pa Spuiters a destaca na plato Angelo Arnold kende a bay di 3-2. Diadomingo awor weganan di Play Off lo continua desde mainta riba veld di Kudawecha mientrastanto pa 2:15pm den AA lo tin e ultimo wega valido prome cu drenta playoff AA entre Mariners y Balashi Premuim. Softball fast pitch a toda maquina.